[274] Sāvatthīnidānaṃ . seyyathāpi himavantaṃ bhikkhave pabbatarājaṃ nissāya nāgā kāyaṃ vaḍḍhenti balaṃ gāhenti te tattha kāyaṃ vaḍḍhetvā balaṃ gāhetvā kusubbhe otaranti kusubbhe otaritvā mahāsobbhe otaranti mahāsobbhe otaritvā kunnadiyo otaranti kunnadiyo otaritvā mahānadiyo otaranti mahānadiyo otaritvā mahāsamuddasāgaraṃ otaranti te tattha mahantattaṃ vepullattaṃ āpajjanti kāyena . evameva kho bhikkhave bhikkhu sīlaṃ nissāya sīle patiṭṭhāya ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto mahantattaṃ vepullattaṃ pāpuṇāti dhammesu.

[275] Kathañca bhikkhave bhikkhu sīlaṃ nissāya sīle patiṭṭhāya ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto mahantattaṃ vepullattaṃ pāpuṇāti dhammesu . idha bhikkhave bhikkhu sammādiṭṭhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ .pe. sammāsamādhiṃ bhāveti vivekanissitaṃ virāganissitaṃ Nirodhanissitaṃ vossaggapariṇāmiṃ . evaṃ kho bhikkhave bhikkhu sīlaṃ nissāya sīle patiṭṭhāya ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto mahantattaṃ vepullattaṃ pāpuṇāti dhammesūti.