[357] Seyyathāpi bhikkhave ayaṃ kāyo āhāraṭṭhitiko āhāraṃ paṭicca tiṭṭhati anāhāro no tiṭṭhati . evameva kho bhikkhave pañca nīvaraṇā āhāraṭṭhitikā āhāraṃ paṭicca tiṭṭhanti anāhārā no tiṭṭhanti.

[358] Ko ca bhikkhave āhāro anuppannassa vā kāmacchandassa uppādāya uppannassa vā kāmacchandassa bhiyyobhāvāya vepullāya . Atthi bhikkhave subhanimittaṃ tattha ayonisomanasikārabahulīkāro ayamāhāro anuppannassa vā kāmacchandassa uppādāya uppannassa vā kāmacchandassa bhiyyobhāvāya vepullāya.

[359] Ko ca bhikkhave āhāro anuppannassa vā byāpādassa uppādāya uppannassa vā byāpādassa bhiyyobhāvāya vepullāya . Atthi bhikkhave paṭighanimittaṃ tattha ayonisomanasikārabahulīkāro ayamāhāro anuppannassa vā byāpādassa uppādāya uppannassa vā byāpādassa bhiyyobhāvāya vepullāya.

[360] Ko ca bhikkhave āhāro anuppannassa vā thīnamiddhassa uppādāya uppannassa vā thīnamiddhassa bhiyyobhāvāya vepullāya . Atthi bhikkhave arati tandi vijambhitā bhattasammado cetaso ca līnattaṃ tattha ayonisomanasikārabahulīkāro ayamāhāro anuppannassa vā thīnamiddhassa uppādāya uppannassa vā thīnamiddhassa bhiyyobhāvāya vepullāya.