[341] Sāvatthīnidānaṃ . sattime bhikkhave anusayā . katame satta . kāmarāgānusayo paṭighānusayo diṭṭhānusayo vicikicchānusayo mānānusayo bhavarāgānusayo avijjānusayo . ime kho bhikkhave satta anusayā.

[342] Imesaṃ kho bhikkhave sattannaṃ anusayānaṃ abhiññāya pariññāya parikkhayāya pahānāya .pe. ayaṃ ariyo aṭṭhaṅgiko maggo bhāvetabboti.

[343] Sāvatthīnidānaṃ . pañcime bhikkhave kāmaguṇā . katame pañca . cakkhuviññeyyā rūpā iṭṭhā kantā manāpā piyarūpā kāmūpasañhitā rajaniyā sotaviññeyyā saddā .pe. Ghānaviññeyyā gandhā . jivhāviññeyyā rasā . kāyaviññeyyā phoṭṭhabbā iṭṭhā kantā manāpā piyarūpā kāmūpasañhitā rajaniyā . Ime kho bhikkhave pañca kāmaguṇā.

[344] Imesaṃ kho bhikkhave pañcannaṃ kāmaguṇānaṃ abhiññāya pariññāya parikkhayāya pahānāya .pe. ayaṃ ariyo aṭṭhaṅgiko maggo bhāvetabboti.