[383] Ekaṃ samayaṃ āyasmā sārīputto sāvatthiyaṃ viharati jetavane anāthapiṇḍikassa ārāme . tatra kho āyasmā sārīputto bhikkhū āmantesi āvuso bhikkhaveti. Āvusoti [1]- te bhikkhū āyasmato sārīputtassa paccassosuṃ . āyasmā sārīputto etadavoca sattime āvuso bojjhaṅgā . katame satta . satisambojjhaṅgo dhammavicayasambojjhaṅgo viriyasambojjhaṅgo pītisambojjhaṅgo passaddhisambojjhaṅgo samādhisambojjhaṅgo upekkhāsambojjhaṅgo . Ime kho āvuso satta bojjhaṅgā.

[384] Imesaṃ khvāhaṃ āvuso sattannaṃ bojjhaṅgānaṃ yena yena Bojjhaṅgena ākaṅkhāmi pubbaṇhasamayaṃ viharituṃ tena tena bojjhaṅgena pubbaṇhasamayaṃ viharāmi yena yena bojjhaṅgena ākaṅkhāmi majjhantikasamayaṃ viharituṃ tena tena bojjhaṅgena majjhantikasamayaṃ viharāmi yena yena bojjhaṅgena ākaṅkhāmi sāyaṇhasamayaṃ viharituṃ tena tena bojjhaṅgena sāyaṇhasamayaṃ viharāmi.

[385] Satisambojjhaṅgo iti ce me āvuso hoti appamāṇoti me hoti susamāraddhoti me hoti tiṭṭhantaṃ [1]- tiṭṭhatīti pajānāmi sacepi me cavati idappaccayā me cavatīti pajānāmi .pe.

[386] Upekkhāsambojjhaṅgo iti ce me āvuso hoti appamāṇoti me hoti susamāraddhoti me hoti tiṭṭhantaṃ tiṭṭhatīti pajānāmi sacepi me cavati idappaccayā me cavatīti pajānāmi.