[403] Ekaṃ samayaṃ āyasmā ca upavāṇo āyasmā ca sārīputto kosambiyaṃ viharanti ghositārāme . atha kho āyasmā sārīputto sāyaṇhasamayaṃ paṭisallāṇā vuṭṭhito yenāyasmā upavāṇo tenupasaṅkami upasaṅkamitvā āyasmatā upavāṇena saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . Ekamantaṃ nisinno kho āyasmā sārīputto āyasmantaṃ upavāṇaṃ etadavoca jāneyya nu kho āvuso upavāṇa bhikkhu paccattaṃ yonisomanasikārā evaṃ susamāraddhā me satta bojjhaṅgā phāsuvihārāya saṃvattantīti . jāneyya kho āvuso sārīputta bhikkhu paccattaṃ yonisomanasikārā evaṃ susamāraddhā me satta bojjhaṅgā phāsuvihārāya saṃvattantīti .

[404] Satisambojjhaṅgaṃ kho āvuso bhikkhu ārabbhamāno pajānāti cittañca me suvimuttaṃ thīnamiddhañca me susamūhataṃ uddhaccakukkuccañca me suppaṭivinītaṃ āraddhañca me viriyaṃ aṭṭhikatvā manasikaromi No ca līnanti .pe.

[405] Upekkhāsambojjhaṅgaṃ āvuso bhikkhu ārabbhamāno pajānāti cittañca me suvimuttaṃ thīnamiddhañca me susamūhataṃ uddhaccakkuccañca me suppaṭivinītaṃ āraddhañca me viriyaṃ aṭṭhikatvā manasikaromi no ca līnanti.

[406] Evaṃ kho āvuso sārīputta bhikkhu jāneyya paccattaṃ yonisomanasikārā evaṃ susamāraddhā me satta bojjhaṅgā phāsuvihārāya saṃvattantīti.