[45] Sāvatthīnidānaṃ . atha kho nandiyo paribbājako yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho nandiyo paribbājako bhagavantaṃ etadavoca kati nu kho bho gotama dhammā bhāvitā bahulīkatā nibbānagamā honti nibbānaparāyanā nibbānapariyosānāti . aṭṭhime kho nandiya dhammā bhāvitā bahulīkatā nibbānagamā honti nibbānaparāyanā nibbānapariyosānā . katame aṭṭha . seyyathīdaṃ . sammādiṭṭhi .pe. sammāsamādhi . ime kho nandiya aṭṭha dhammā bhāvitā bahulīkatā nibbānagamā honti nibbānaparāyanā nibbānapariyosānāti.

[46] Evaṃ vutte nandiyo paribbājako bhagavantaṃ etadavoca abhikkantaṃ bho gotama abhikkantaṃ bho gotama seyyathāpi bho gotama nikkujjitaṃ vā ukkujjeyya paṭicchannaṃ vā vivareyya mūḷhassa vā maggaṃ ācikkheyya andhakāre vā telappajjotaṃ dhāreyya cakkhumanto rūpāni dakkhantīti . evameva bhotā gotamena anekapariyāyena dhammo pakāsito esāhaṃ bhavantaṃ gotamaṃ saraṇaṃ Gacchāmi dhammañca bhikkhusaṅghañca upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṅgatanti. Avijjāvaggo paṭhamo. Tassuddānaṃ avijjañca upaḍḍhaṃ ca sārīputto ca brāhmaṇo kimatthiyaṃ ca dve bhikkhū vibhaṅgo sukanandiyāti . -----------