[455] Nāhaṃ bhikkhave aññaṃ ekadhammaṃpi samanupassāmi yo evaṃ bhāvito bahulīkato saññojaniyānaṃ dhammānaṃ pahānāya saṃvattati yathayidaṃ bhikkhave satta bojjhaṅgā . katame satta . satisambojjhaṅgo .pe. Upekkhāsambojjhaṅgo.

[456] Kathaṃ bhāvitā ca bhikkhave satta bojjhaṅgā kathaṃ bahulīkatā saññojaniyānaṃ dhammānaṃ pahānāya saṃvattanti . idha bhikkhave bhikkhu satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ .pe. upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ . evaṃ bhāvitā kho bhikkhave satta bojjhaṅgā evaṃ bahulīkatā saññojaniyānaṃ dhammānaṃ pahānāya saṃvattanti.

[457] Katame ca bhikkhave saññojaniyā dhammā . Cakkhuṃ bhikkhave saññojaniyo dhammo etthete uppajjanti saññojanavinibandhā ajjhosānā sotaṃ ghānaṃ jivhā saññojaniyo dhammo etthete uppajjanti saññojanavinibandhā ajjhosānā .pe. mano saññojaniyo dhammo etthete uppajjanti saññojanavinibandhā ajjhosānā . Ime vuccanti bhikkhave saññojaniyā dhammāti.