[501] Pañcime bhikkhave nīvaraṇā andhakaraṇā acakkhukaraṇā aññāṇakaraṇā paññānirodhiyā vighātapakkhiyā anibbānasaṃvattanikā . Katame pañca . kāmacchandanīvaraṇaṃ bhikkhave andhakaraṇaṃ acakkhukaraṇaṃ aññāṇakaraṇaṃ paññānirodhiyaṃ vighātapakkhiyaṃ anibbānasaṃvattanikaṃ . Saṃvattanikaṃ . byāpādanīvaraṇaṃ bhikkhave andhakaraṇaṃ .pe. thīnamiddhanīvaraṇaṃ bhikkhave andhakaraṇaṃ . uddhaccakukkuccanīvaraṇaṃ bhikkhave andhakaraṇaṃ . Vicikicchānīvaraṇaṃ bhikkhave andhakaraṇaṃ acakkhukaraṇaṃ aññāṇakaraṇaṃ paññānirodhiyaṃ vighātapakkhiyaṃ anibbānasaṃvattanikaṃ . ime [1]- bhikkhave pañca nīvaraṇā andhakaraṇā acakkhukaraṇā aññāṇakaraṇā paññānirodhiyā vighātapakkhiyā anibbānasaṃvattanikā.

[502] Sattime bhikkhave bojjhaṅgā cakkhukaraṇā ñāṇakaraṇā paññāvuḍḍhiyā avighātapakkhiyā nibbānasaṃvattanikā . katame satta . Satisambojjhaṅgo bhikkhave cakkhukaraṇo ñāṇakaraṇo paññāvuḍḍhiyo avighātapakkhiyo nibbānasaṃvattaniko .pe. upekkhāsambojjhaṅgo bhikkhave cakkhukaraṇo ñāṇakaraṇo paññāvuḍḍhiyo avighātapakkhiyo nibbānasaṃvattaniko . ime kho bhikkhave satta bojjhaṅgā cakkhukaraṇā ñāṇakaraṇā paññāvuḍḍhiyā avighātapakkhiyā nibbānasaṃvattanikāti. Nīvaraṇavaggo catuttho. Tassuddānaṃ dve kusalā kileso ca dve yoniso ca vuḍḍhi ca anāvaraṇā aparihāni nīvaraṇāvaraṇā rukkhaṃ nīvaraṇena ca te dasāti. --------------