[508] Sāvatthī . atha kho aññataro bhikkhu yena bhagavā tenupasaṅkami .pe. ekamantaṃ nisinno kho so bhikkhu bhagavantaṃ etadavoca duppañño eḷamūgo duppañño eḷamūgoti bhante vuccati kittāvatā nu kho bhante duppañño eḷamūgoti vuccatīti.

[509] Sattannaṃ kho bhikkhu bojjhaṅgānaṃ abhāvitattā abahulīkatattā duppañño eḷamūgoti vuccati . katamesaṃ sattannaṃ . Satisambojjhaṅgassa .pe. upekkhāsambojjhaṅgassa . imesaṃ kho Bhikkhu sattannaṃ bojjhaṅgānaṃ abhāvitattā abahulīkatattā duppañño eḷamūgoti vuccatīti.