[573] Ekaṃ samayaṃ bhagavā koliyesu viharati haliddavasanannāma koliyānaṃ nigamo . atha kho sambahulā bhikkhū pubbaṇhasamayaṃ nivāsetvā pattacīvaramādāya haliddavasanaṃ piṇḍāya pāvisiṃsu . Atha kho tesaṃ bhikkhūnaṃ etadahosi atippago kho tāva haliddavasanaṃ piṇḍāya carituṃ yannūna mayaṃ yena aññatitthiyānaṃ paribbājakānaṃ ārāmo tenupasaṅkameyyāmāti.

[574] Atha kho te bhikkhū yena aññatitthiyānaṃ paribbājakānaṃ ārāmo tenupasaṅkamiṃsu upasaṅkamitvā tehi aññatitthiyehi paribbājakehi saddhiṃ sammodiṃsu sammodanīyaṃ kathaṃ sārāṇīyaṃ vītisāretvā ekamantaṃ nisīdiṃsu . ekamantaṃ nisinne kho te bhikkhū te aññatitthiyā paribbājakā etadavocuṃ.

[575] Samaṇo āvuso gotamo sāvakānaṃ evaṃ dhammaṃ deseti etha tumhe bhikkhave pañca nīvaraṇe pahāya cetaso upakkilese paññāya dubbalīkaraṇe mettāsahagatena cetasā ekaṃ disaṃ pharitvā viharatha tathā dutiyaṃ . tathā tatiyaṃ . tathā catutthaṃ . iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjhena pharitvā viharatha.

[576] Karuṇāsahagatena cetasā ekaṃ disaṃ pharitvā viharatha tathā dutiyaṃ . tathā tatiyaṃ . tathā catutthaṃ . iti uddhamadho tiriyaṃ sabbadhi Sabbattatāya sabbāvantaṃ lokaṃ karuṇāsahagatena cetasā vipulena mahaggatena appamāṇena averena abyāpajjhena pharitvā viharatha.