[733] Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tena kho pana samayena āyasmā sārīputto magadhesu viharati nāḷakagāmake ābādhiko dukkhito bāḷhagilāno . Cundo [1]- samaṇuddeso āyasmato sārīputtassa upaṭṭhāko hoti. Atha kho āyasmā sārīputto teneva ābādhena parinibbāyi.

[734] Atha kho cundo samaṇuddeso āyasmato sārīputtassa pattacīvaramādāya yena sāvatthījetavanaṃ anāthapiṇḍikassa ārāmo yenāyasmā ānando tenupasaṅkami upasaṅkamitvā āyasmantaṃ ānandaṃ abhivādetvā ekamantaṃ nisīdi . ekamantaṃ nisinno kho cundo samaṇuddeso āyasmantaṃ ānandaṃ etadavoca āyasmā bhante sārīputto parinibbuto idamassa pattacīvaranti . atthi kho idaṃ āvuso cunda kathāpābhataṃ bhagavantaṃ dassanāya āyāmāvuso cunda yena bhagavā tenupasaṅkamissāma upasaṅkamitvā bhagavato etamatthaṃ ārocessāmāti . evaṃ bhanteti kho cundo samaṇuddeso āyasmato ānandassa paccassosi.

[735] Atha kho āyasmā ca ānando cundo ca samaṇuddeso yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinno kho āyasmā ānando Bhagavantaṃ etadavoca ayaṃ bhante cundo samaṇuddeso evamāha āyasmā bhante sārīputto parinibbuto idamassa pattacīvaranti . Api ca me bhante madhurakajāto viya kāyo disāpi me na pakkhāyanti dhammāpi maṃ nappaṭibhanti āyasmā sārīputto parinibbutoti sutvā.

[736] Kiṃ nu kho [1]- ānanda sārīputto sīlakkhandhaṃ vā ādāya parinibbuto samādhikkhandhaṃ vā ādāya parinibbuto paññākkhandhaṃ vā ādāya parinibbuto vimuttikkhandhaṃ vā ādāya parinibbuto vimutti- ñāṇadassanakkhandhaṃ vā ādāya parinibbutoti . na [2]- kho me [3]- bhante āyasmā sārīputto sīlakkhandhaṃ vā ādāya parinibbuto .pe. Vimuttiñāṇadassanakkhandhaṃ vā ādāya parinibbuto . api ca me bhante āyasmā sārīputto ovādako ahosi [4]- viññāpako sandassako samādapako samuttejako sampahaṃsako akilāsu dhammadesanāya anuggāhako sabrahmacārīnaṃ taṃ mayaṃ āyasmato sārīputtassa dhammojaṃ dhammabhogaṃ dhammānuggahaṃ anussarāmāti.