[949] Pañcimāni bhikkhave indriyāni. Katamāni pañca. Sukhindriyaṃ dukkhindriyaṃ somanassindriyaṃ domanassindriyaṃ upekkhindriyaṃ.

[950] Sukhavedaniyaṃ bhikkhave phassaṃ paṭicca uppajjati sukhindriyaṃ. So sukhitova samāno sukhitosmīti pajānāti tasseva sukhavedaniyassa phassassa nirodhā yantajjaṃ vedayitaṃ sukhavedaniyaṃ phassaṃ paṭicca uppannaṃ sukhindriyaṃ taṃ nirujjhati taṃ vūpasamatīti pajānāti.

[951] Dukkhavedaniyaṃ bhikkhave phassaṃ paṭicca uppajjati dukkhindriyaṃ. So dukkhitova samāno dukkhitosmīti pajānāti tasseva dukkhavedaniyassa phassassa nirodhā yantajjaṃ vedayitaṃ [2]- dukkhavedaniyaṃ phassaṃ paṭicca uppannaṃ dukkhindriyaṃ taṃ nirujjhati taṃ vūpasamatīti pajānāti.

[952] Somanassavedaniyaṃ bhikkhave phassaṃ paṭicca uppajjati somanassindriyaṃ . so sumanova samāno sumanosmīti pajānāti tasseva somanassavedaniyassa phassassa nirodhā yantajjaṃ vedayitaṃ somanassavedaniyaṃ phassaṃ paṭicca uppannaṃ somanassindriyaṃ taṃ nirujjhati taṃ vūpasamatīti pajānāti.