[987] Evamme sutaṃ ekaṃ samayaṃ bhagavā sāvatthiyaṃ viharati pubbārāme rāme migāramātupāsāde . tatra kho bhagavā bhikkhū āmantesi katinaṃ nu kho bhikkhave indriyānaṃ bhāvitattā bahulīkatattā khīṇāsavo bhikkhu aññaṃ byākaroti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. Bhagavaṃmūlakā no bhante dhammā .pe.

[988] Ekassa kho bhikkhave indriyassa bhāvitattā bahulīkatattā khīṇāsavo bhikkhu aññaṃ byākaroti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti. Katamassa ekassa. Paññindriyassa .

[989] Paññavato bhikkhave ariyasāvakassa tadanvayā saddhā saṇṭhāti tadanvayaṃ viriyaṃ saṇṭhāti tadanvayā sati saṇṭhāti tadanvayo samādhi saṇṭhāti.

[990] Imassa kho bhikkhave ekassa indriyassa bhāvitattā bahulīkatattā khīṇāsavo bhikkhu aññaṃ byākaroti khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmīti.