[1027] Evamme sutaṃ ekaṃ samayaṃ bhagavā mallakesu viharati Uruvelakappaṃ nāma mallakānaṃ nigamo . tatra kho bhagavā bhikkhū āmantesi

[1028] Yāvakīvañca bhikkhave ariyasāvakassa ariyañāṇaṃ na uppannaṃ hoti neva tāva catunnaṃ indriyānaṃ saṇṭhiti hoti neva tāva catunnaṃ indriyānaṃ avaṭṭhiti hoti . yato ca kho bhikkhave ariyasāvakassa ariyañāṇaṃ uppannaṃ hoti atha catunnaṃ indriyānaṃ saṇṭhiti hoti atha catunnaṃ indriyānaṃ avaṭṭhiti hoti.

[1029] Seyyathāpi bhikkhave yāvakīvañca kūṭāgārassa kūṭaṃ na ussitaṃ hoti neva tāva gopānasīnaṃ saṇṭhiti hoti neva tāva gopānasīnaṃ avaṭṭhiti hoti . yato ca kho bhikkhave kūṭāgārassa kūṭaṃ ussitaṃ hoti atha kho gopānasīnaṃ saṇṭhiti hoti atha kho gopānasīnaṃ avaṭṭhiti hoti . evameva kho bhikkhave yāvakīvañca ariyasāvakassa ariyañāṇaṃ na uppannaṃ hoti neva tāva catunnaṃ indriyānaṃ saṇṭhiti hoti neva tāva catunnaṃ indriyānaṃ avaṭṭhiti hoti . yato ca kho bhikkhave ariyasāvakassa ariyañāṇaṃ uppannaṃ hoti atha catunnaṃ indriyānaṃ .pe. avaṭṭhiti hoti . katamesaṃ catunnaṃ . Saddhindriyassa viriyindriyassa satindriyassa samādhindriyassa.

[1030] Paññavato bhikkhave ariyasāvakassa tadanvayā saddhā saṇṭhāti tadanvayaṃ viriyaṃ saṇṭhāti tadanvayā sati saṇṭhāti tadanvayo samādhi saṇṭhātīti.