[1150] Chandaṃ ce bhikkhave bhikkhu nissāya labhati samādhiṃ labhati cittassa ekaggataṃ . ayaṃ vuccati chandasamādhi . so anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati viriyaṃ ārabhati cittaṃ paggaṇhāti padahati . uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati viriyaṃ ārabhati cittaṃ paggaṇhāti padahati . anuppannānaṃ kusalānaṃ dhammānaṃ uppādāya chandaṃ janeti vāyamati viriyaṃ ārabhati cittaṃ paggaṇhāti padahati . Uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati viriyaṃ ārabhati cittaṃ paggaṇhāti padahati . ime vuccanti padhānasaṅkhārāti . iti ayaṃ ca chando ayaṃ ca chandasamādhi ime ca padhānasaṅkhārā . ayaṃ vuccati bhikkhave chandasamādhipadhānasaṅkhārasamannāgato iddhipādo.

[1151] Viriyaṃ ce bhikkhave bhikkhu nissāya labhati samādhiṃ labhati cittassa ekaggataṃ . ayaṃ vuccati viriyasamādhi . so anuppannānaṃ .pe. uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati viriyaṃ ārabhati cittaṃ paggaṇhāti padahati . ime vuccanti padhānasaṅkhārāti . Iti idaṃ ca viriyaṃ ayaṃ ca viriyasamādhi ime ca padhānasaṅkhārā. Ayaṃ vuccati bhikkhave viriyasamādhipadhānasaṅkhārasamannāgato iddhipādo.

[1152] Cittaṃ ce bhikkhave bhikkhu nissāya labhati samādhiṃ labhati cittassa ekaggataṃ . ayaṃ vuccati cittasamādhi . so anuppannānaṃ .pe. uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati viriyaṃ ārabhati cittaṃ paggaṇhāti padahati . ime vuccanti padhānasaṅkhārāti . Iti idañca cittaṃ ayaṃ ca cittasamādhi ime ca padhānasaṅkhārā . Ayaṃ vuccati bhikkhave cittasamādhipadhānasaṅkhārasamannāgato Iddhipādo.

[1153] Vīmaṃsaṃ ce bhikkhave bhikkhu nissāya labhati samādhiṃ labhati cittassa ekaggataṃ . ayaṃ vuccati vīmaṃsāsamādhi . so anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati viriyaṃ ārabhati cittaṃ paggaṇhāti padahati .pe. uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati viriyaṃ ārabhati cittaṃ paggaṇhāti padahati . ime vuccanti padhānasaṅkhārāti . iti ayaṃ ca vīmaṃsā ayañca vīmaṃsāsamādhi ime ca padhānasaṅkhārā . ayaṃ vuccati bhikkhave vīmaṃsāsamādhipadhānasaṅkhārasamannāgato iddhipādoti.