[117] Sāvatthīnidānaṃ . sace vo bhikkhave aññatitthiyā paribbājakā evaṃ puccheyyuṃ kimatthiyaṃ āvuso samaṇe gotame brahmacariyaṃ vussatīti . evaṃ puṭṭhā tumhe bhikkhave tesaṃ aññatitthiyānaṃ paribbājakānaṃ evaṃ byākareyyātha rāgavirāgatthaṃ kho āvuso bhagavati brahmacariyaṃ vussatīti.

[118] Sace pana vo bhikkhave aññatitthiyā paribbājakā evaṃ puccheyyuṃ atthi panāvuso maggo atthi paṭipadā rāgavirāgāyāti. Evaṃ puṭṭhā tumhe bhikkhave tesaṃ aññatitthiyānaṃ paribbājakānaṃ evaṃ byākareyyātha atthi kho āvuso maggo atthi paṭipadā rāgavirāgāyāti.

[119] Katamo ca bhikkhave maggo katamā ca paṭipadā rāgavirāgāya . ayamevāriyo aṭṭhaṅgiko maggo . seyyathīdaṃ . Sammādiṭṭhi .pe. sammāsamādhi . ayaṃ bhikkhave maggo ayaṃ paṭipadā rāgavirāgāyāti . evaṃ puṭṭhā tumhe bhikkhave tesaṃ aññatitthiyānaṃ paribbājakānaṃ evaṃ byākareyyāthāti.

[120] Sāvatthīnidānaṃ . sace vo bhikkhave aññatitthiyā paribbājakā evaṃ puccheyyuṃ kimatthiyaṃ āvuso samaṇe gotame brahmacariyaṃ vussatīti . evaṃ puṭṭhā tumhe bhikkhave tesaṃ aññatitthiyānaṃ Paribbājakānaṃ evaṃ byākareyyātha saññojanapahānatthaṃ kho āvuso bhagavati brahmacariyaṃ vussatīti .pe.