[1425] Ekaṃ samayaṃ āyasmā ca sārīputto āyasmā ca ānando sāvatthiyaṃ viharanti jetavane anāthapiṇḍikassa ārāme . Atha kho āyasmā ānando sāyaṇhasamayaṃ paṭisallānā vuṭṭhito yenāyasmā sārīputto tenupasaṅkami upasaṅkamitvā ekamantaṃ nisīdi . Ekamantaṃ nisinno kho āyasmā ānando āyasmantaṃ sārīputtaṃ etadavoca katinaṃ nu kho āvuso sārīputta dhammānaṃ samannāgamanahetu evamayaṃ pajā bhagavatā byākatā sotāpannā avinipātadhammā niyatā sambodhiparāyanāti.

[1426] Catunnaṃ kho āvuso dhammānaṃ samannāgamanahetu evamayaṃ pajā bhagavatā byākatā sotāpannā avinipātadhammā niyatā sambodhiparāyanā . katamesaṃ catunnaṃ . idhāvuso ariyasāvako buddhe aveccappasādena samannāgato hoti itipi so bhagavā .pe. Satthā devamanussānaṃ buddho bhagavāti . dhamme .pe. saṅghe .pe. Ariyakantehi sīlehi samannāgato hoti akkhaṇḍehi .pe. Samādhisaṃvattanikehi . imesaṃ kho āvuso catunnaṃ dhammānaṃ samannāgamanahetu evamayaṃ pajā bhagavatā byākatā sotāpannā avinipātadhammā niyatā sambodhiparāyanāti.