[1450] Na kho pana mayaṃ bhante abhijānāma tāsu bhaginīsu pāpakaṃ cittaṃ uppādetā . ayaṃ kho no bhante etamhā sambādhā añño sambādho sambādhataro ceva sambādhasaṅkhātataro cāti.

[1451] Tasmā tiha thapatayo sambādho gharāvāso rajāpatho abbhokāso pabbajjā alaṃ ca pana vo thapatayo appamādāya.

[1452] Catūhi kho thapatayo dhammehi samannāgato ariyasāvako sotāpanno hoti avinipātadhammo niyato sambodhiparāyano . Katamehi catūhi . idha thapatayo ariyasāvako buddhe aveccappasādena samannāgato hoti itipi so bhagavā .pe. satthā devamanussānaṃ buddho bhagavāti . dhamme saṅghe . vigatamalamaccherena cetasā agāraṃ ajjhāvasati muttacāgo payatapāṇī vossaggarato yācayogo dānasaṃvibhāgarato . imehi kho thapatayo catūhi dhammehi samannāgato Ariyasāvako sotāpanno hoti avinipātadhammo niyato sambodhiparāyano.

[1453] Tumhe kho thapatayo buddhe aveccappasādena samannāgatā itipi so bhagavā .pe. satthā devamanussānaṃ buddho bhagavāti . Dhamme saṅghe . yaṃ kho pana kiñci kule deyyadhammaṃ sabbantaṃ appaṭivibhattaṃ sīlavantehi kalyāṇadhammehi . taṃ kiṃ maññatha thapatayo . Kati viya te kosalesu manussā ye tumhākaṃ samasamā yadidaṃ dānadānasaṃvibhāgehīti . lābhā no bhante suladdhaṃ no bhante yesaṃ no bhagavā evaṃ pajānātīti.