[1517] Atha kho mahānāmo ca sakko godhā ca sakko yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinno kho mahānāmo sakko bhagavantaṃ etadavoca idhāhaṃ bhante yena godhā sakko tenupasaṅkamiṃ upasaṅkamitvā godhaṃ sakkaṃ etadavocaṃ katihi tvaṃ godhe dhammehi samannāgataṃ sotāpannaṃ puggalaṃ ājānāsi avinipādhammaṃ niyataṃ sambodhiparāyananti.

[1518] Evaṃ vutte bhante godhā sakko maṃ etadavoca tīhi khvāhaṃ mahānāma dhammehi samannāgataṃ sotāpannaṃ puggalaṃ ājānāmi avinipātadhammaṃ niyataṃ sambodhiparāyanaṃ . katamehi tīhi . idha mahānāma ariyasāvako buddhe aveccappasādena samannāgato hoti itipi so bhagavā .pe. satthā devamanussānaṃ buddho bhagavāti . Dhamme saṅghe . aveccappasādena samannāgato hoti supaṭipanno bhagavato sāvakasaṅgho .pe. anuttaraṃ puññakkhettaṃ lokassāti . Imehi khvāhaṃ mahānāma tīhi dhammehi samannāgataṃ sotāpannaṃ puggalaṃ ājānāmi avinipātadhammaṃ niyataṃ sambodhiparāyanaṃ . tvaṃ pana mahānāma katihi dhammehi samannāgataṃ sotāpannaṃ puggalaṃ ājānāsi avinipātadhammaṃ niyataṃ sambodhiparāyananti.

[1519] Evaṃ vuttāhaṃ bhante godhaṃ sakkaṃ etadavocaṃ catūhi khvāhaṃ godhe dhammehi samannāgataṃ sotāpannaṃ puggalaṃ ājānāmi avinipātadhammaṃ niyataṃ sambodhiparāyanaṃ . katamehi catūhi . idha godhe ariyasāvako buddhe aveccappasādena samannāgato hoti itipi so bhagavā .pe. satthā devamanussānaṃ buddho bhagavāti . Dhamme saṅghe . ariyakantehi sīlehi samannāgato hoti akkhaṇḍehi .pe. samādhisaṃvattanikehi . imehi khvāhaṃ godhe catūhi dhammehi samannāgataṃ sotāpannaṃ puggalaṃ ājānāmi avinipātadhammaṃ niyataṃ sambodhiparāyananti.

[1520] Evaṃ vutte bhante godhā sakko maṃ etadavoca āgamehi tvaṃ mahāmāma āgamehi tvaṃ mahānāma bhagavāva etaṃ jāneyya etehi dhammehi samannāgataṃ vā asamannāgataṃ vāti.