[1537] Kapilavatthunidānaṃ . tena kho pana samayena sarakāni sakko kālakato hoti . so bhagavatā byākato sotāpanno avinipātadhammo niyato sambodhiparāyanoti . tatra sudaṃ sambahulā sakkā saṅgamma samāgamma ujjhāyanti khīyanti vipācenti acchariyaṃ vata bho abbhutaṃ vata bho etthadāni ko na sotāpanno bhavissati yatra hi nāma sarakāni sakko kālakato bhagavatā byākato sotāpanno avinipātadhammo niyato sambodhiparāyanoti . sarakāni sakko sikkhāya aparipūrīkārī ahosīti.

[1538] Atha kho mahānāmo sakko yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho mahānāmo sakko bhagavantaṃ etadavoca idha bhante sarakāni sakko kālakato so bhagavatā byākato sotāpanno avinipātadhammo niyato sambodhiparāyanoti . tatra sudaṃ bhante sambahulā sakkā saṅgamma samāgamma ujjhāyanti khīyanti vipācenti acchariyaṃ vata bho abbhutaṃ vata bho etthadāni ko na sotāpanno bhavissati yatra hi nāma sarakāni sakko kālakato so bhagavatā byākato sotāpanno avinipātadhammo niyato sambodhiparāyanoti . Sarakāni sakko sikkhāya aparipūrīkārī ahosīti.

[1539] Yo so mahānāma dīgharattaṃ upāsako buddhaṃ saraṇaṃ gato dhammaṃ saraṇaṃ gato saṅghaṃ saraṇaṃ gato so kathaṃ vinipātaṃ gaccheyya . yañhi taṃ mahānāma sammā vadamāno vadeyya dīgharattaṃ upāsako buddhaṃ saraṇaṃ gato dhammaṃ saraṇaṃ gato saṅghaṃ saraṇaṃ gatoti sarakāniṃ sakkaṃ sammā vadamāno vadeyya sarakāni mahānāma sakko dīgharattaṃ upāsako buddhaṃ saraṇaṃ gato dhammaṃ saraṇaṃ gato saṅghaṃ saraṇaṃ gato so kathaṃ vinipātaṃ gaccheyya.

[1540] Idha mahānāma ekacco puggalo buddhe ekantagato hoti abhippasanno itipi so bhagavā .pe. satthā devamanussānaṃ buddho bhagavāti . dhamme saṅghe . hāsapañño javanapañño vimuttiyā ca samannāgato . so āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati . ayampi kho mahānāma puggalo parimutto nirayā parimutto tiracchānayoniyā parimutto pittivisayā parimutto apāyaduggativinipātā.