[1563] Yathārūpāya kho gahapati micchāvimuttiyā samannāgato assutavā puthujjano kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati tathārūpā te micchāvimutti natthi . Atthi ca kho te gahapati sammāvimutti . tañca pana te sammāvimuttiṃ attani samanupassato ṭhānaso vedanā paṭippassambheyunti.

[1564] Atha kho anāthapiṇḍikassa gahapatissa ṭhānaso vedanā paṭippassambhiṃsu . atha kho anāthapiṇḍiko gahapati āyasmantañca sārīputtaṃ āyasmantañca ānandaṃ sakeneva thālipākena parivisi . Atha kho anāthapiṇḍiko gahapati āyasmantaṃ sārīputtaṃ bhuttāviṃ onītapattapāṇiṃ aññataraṃ nīcaṃ āsanaṃ gahetvā ekamantaṃ nisīdi . Ekamantaṃ nisinnaṃ kho anāthapiṇḍikaṃ gahapatiṃ āyasmā sārīputto imāhi gāthāhi anumodi

[1565] Yassa saddhā tathāgate acalā supatiṭṭhitā sīlañca yassa kalyāṇaṃ ariyakantaṃ pasaṃsitaṃ. Saṅghe pasādo yassatthi ujubhūtañca dassanaṃ adaḷiddoti taṃ āhu amoghantassa jīvitaṃ. Tasmā saddhañca sīlañca pasādaṃ dhammadassanaṃ anuyuñjetha medhāvī saraṃ buddhānasāsananti.

[1566] Atha kho āyasmā sārīputto anāthapiṇḍikaṃ gahapatiṃ imāhi gāthāhi anumoditvā uṭṭhāyāsanā pakkāmi.