[1599] Ekaṃ samayaṃ bhagavā sakkesu viharati kapilavatthusmiṃ nigrodhārāme . atha kho nandiyo sakko yena bhagavā tenupasaṅkami Upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho nandiyo sakko bhagavantaṃ etadavoca

[1600] Yasseva nu kho bhante ariyasāvakassa cattāri sotāpattiyaṅgāni sabbena sabbaṃ sabbathā sabbaṃ natthi sveva nu kho bhante ariyasāvako pamādavihārīti vuccati . yassa kho nandiya cattāri sotāpattiyaṅgāni sabbena sabbaṃ sabbathā sabbaṃ natthi tamahaṃ bāhiro puthujjanapakkhe ṭhitoti vadāmi . apica nandiya yathā ariyasāvako pamādavihārī ceva hoti appamādavihārī ca taṃ suṇāhi sādhukaṃ manasikarohi bhāsissāmīti . evaṃ bhanteti kho nandiyo sakko bhagavato paccassosi. Bhagavā etadavoca

[1601] Kathañca nandiya ariyasāvako pamādavihārī hoti . idha nandiya ariyasāvako buddhe aveccappasādena samannāgato hoti itipi so bhagavā .pe. satthā devamanussānaṃ buddho bhagavāti . So tena buddhe aveccappasādena santuṭṭho na uttariṃ vāyamati divā pavivekāya rattiyā paṭisallānāya . tassa evaṃ pamattassa viharato pāmujjaṃ na hoti pāmujje asati pīti na hoti pītiyā asati passaddhi na hoti passaddhiyā asati dukkhaṃ viharati dukkhino cittaṃ na samādhiyati asamāhite citte dhammā na pātubhavanti . dhammānaṃ apātubhāvā pamādavihārītveva saṅkhaṃ gacchati . puna caparaṃ nandiya ariyasāvako . dhamme saṅghe . ariyakantehi sīlehi samannāgato Hoti akkhaṇḍehi .pe. samādhisaṃvattanikehi . so tehi ariyakantehi sīlehi santuṭṭho na uttariṃ vāyamati divā pavivekāya rattiyā paṭisallānāya . tassa evaṃ pamattassa viharato pāmujjaṃ na hoti pāmujje asati pīti na hoti pītiyā asati passaddhi na hoti passaddhiyā asati dukkhaṃ viharati dukkhino cittaṃ na samādhiyati asamāhite citte dhammā na pātubhavanti . dhammānaṃ apātubhāvā pamādavihārītveva saṅkhaṃ gacchati . evaṃ kho nandiya ariyasāvako pamādavihārī hoti.