[1602] Kathañca nandiya ariyasāvako appamādavihārī hoti . Idha nandiya ariyasāvako buddhe aveccappasādena samannāgato hoti itipi so bhagavā .pe. satthā devamanussānaṃ buddho bhagavāti . so tena buddhe aveccappasādena asantuṭṭho uttariṃ vāyamati divā pavivekāya rattiyā paṭisallānāya . tassa evaṃ appamattassa viharato pāmujjaṃ jāyati pamuditassa pīti jāyati pītimanassa kāyo passambhati passaddhakāyo sukhaṃ vedayati sukhino cittaṃ samādhiyati samāhite citte dhammā pātubhavanti . dhammānaṃ pātubhāvā appamādavihārītveva saṅkhaṃ gacchati . puna caparaṃ nandiya ariyasāvako dhamme saṅghe . ariyakantehi sīlehi samannāgato hoti akkhaṇḍehi .pe. samādhisaṃvattanikehi . so tehi ariyakantehi sīlehi asantuṭṭho uttariṃ vāyamati divā pavivekāya rattiyā Paṭisallānāya . tassa evaṃ appamattassa viharato pāmujjaṃ jāyati pamuditassa pīti jāyati pītimanassa kāyo passambhati passaddhakāyo sukhaṃ vedayati sukhino cittaṃ samādhiyati samāhite citte dhammā pātubhavanti . dhammānaṃ pātubhāvā appamādavihārītveva saṅkhaṃ gacchati. Evaṃ kho nandiya ariyasāvako appamādavihārī hotīti. Puññābhisandavaggo catuttho. Tassuddānaṃ abhisandena tayo vuttā dve devapadāni ca sabhāgataṃ mahānāmo vāsī kāḷi ca nandiyāti. -------------