[1631] So evamassa vacanīyo atthi panāyasmato mānusakesu pañcasu kāmaguṇesu apekkhāti . so ce evaṃ vadeyya atthi me mānusakesu pañcasu kāmaguṇesu apekkhāti . so evamassa vacanīyo mānusakehi kho āvuso kāmehi dibbā kāmā abhikkantatarā ca paṇītatarā ca sādhāyasmā mānusakehi kāmehi cittaṃ vuṭṭhāpetvā cātummahārājikesu devesu cittaṃ adhimocehīti . so ce evaṃ vadeyya mānusakehi me kāmehi cittaṃ vuṭṭhitaṃ cātummahārājikesu devesu cittaṃ adhimocitanti.

[1632] So evamassa vacanīyo cātummahārājikehi kho āvuso devehi tāvatiṃsā devā abhikkantatarā ca paṇītatarā ca sādhāyasmā Cātummahārājikehi devehi cittaṃ vuṭṭhāpetvā tāvatiṃsesu devesu cittaṃ adhimocehīti . so ce evaṃ vadeyya cātummahārājikehi me devehi cittaṃ vuṭṭhitaṃ tāvatiṃsesu devesu cittaṃ adhimocitanti . So evamassa vacanīyo tāvatiṃsehi kho āvuso devehi yāmā devā . tusitā devā . nimmānaratī devā . paranimmitavasavattino devā . paranimmitavasavattīhi kho āvuso devehi brahmaloko abhikkantataro ca paṇītataro ca sādhāyasmā paranimmitavasavattīhi devehi cittaṃ vuṭṭhāpetvā brahmaloke cittaṃ adhimocehīti . so ce evaṃ vadeyya paranimmitavasavattīhi me devehi cittaṃ vuṭṭhitaṃ brahmaloke cittaṃ adhimocitanti.

[1633] So evamassa vacanīyo brahmalokopi kho āvuso anicco addhuvo sakkāyapariyāpanno sādhāyasmā brahmalokā cittaṃ vuṭṭhāpetvā sakkāyanirodhe cittaṃ upasaṃharāti . so ce evaṃ vadeyya brahmalokā me cittaṃ vuṭṭhitaṃ sakkāyanirodhe cittaṃ upasaṃhatanti . Evaṃ vimuttacittassa kho mahānāma upāsakassa vassasataṃ vimuttacittena bhikkhunā na kiñci nānākaraṇaṃ vadāmi yadidaṃ vimuttiyā vimuttanti .