[1790] Evameva kho bhikkhave appakā te sattā ye ukkoṭanavañcananikatisāviyogā paṭiviratā atha kho eteva bahutarā sattā ye ukkoṭanavañcananikatisāviyogā appaṭiviratā .pe.

[1791] Evameva kho bhikkhave appakā te sattā ye chedanavadhana- bandhanaviparāmosaālopasahasākārā paṭiviratā atha kho eteva bahutarā sattā ye chedanavadhanabandhanaviparāmosaālopasahasākārā Appaṭiviratā . taṃ kissa hetu . adiṭṭhattā bhikkhave catunnaṃ ariyasaccānaṃ . katamesaṃ catunnaṃ . dukkhassa ariyasaccassa .pe. Dukkhanirodhagāminīpaṭipadāya ariyasaccassa . tasmā tiha bhikkhave idaṃ dukkhanti yogo karaṇīyo .pe. ayaṃ dukkhanirodhagāminī paṭipadāti yogo karaṇīyoti.

[1792] Atha kho bhagavā parittaṃ nakhasikhāyaṃ paṃsuṃ āropetvā bhikkhū āmantesi taṃ kiṃ maññatha bhikkhave katamaṃ nu kho bahutaraṃ . Yo vāyaṃ mayā paritto nakhasikhāyaṃ paṃsu āropito ayaṃ vā mahāpaṭhavīti. Etadeva bhante bahutaraṃ yadidaṃ mahāpaṭhavī appamattakāyaṃ bhagavatā paritto nakhasikhāyaṃ paṃsu āropito saṅkhampi na upeti upanidhampi na upeti kalabhāgampi na upeti mahāpaṭhaviṃ upanidhāya bhagavatā paritto nakhasikhāyaṃ paṃsu āropitoti . evameva kho bhikkhave appakā te sattā ye manussā cutā manussesu paccājāyanti atha kho eteva bahutarā sattā ye manussā cutā niraye paccājāyanti .pe.

[1793] Evameva kho bhikkhave appakā te sattā ye manussā cutā manussesu paccājāyanti atha kho eteva bahutarā sattā ye manussā cutā tiracchānayoniyā paccājāyanti . (iminā nayena pañca gatiyo vitthāretabbā) . evameva kho bhikkhave appakā te sattā ye manussā cutā devesu paccājāyanti atha kho Eteva bahutarā sattā ye manussā cutā niraye paccājāyanti . Tiracchānayoniyā paccājāyanti. Pittivisaye paccājāyanti.