[571] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena chabbaggiyā bhikkhū dvirattatirattaṃ senāya vasamānā uyyodhikaṃpi balaggaṃpi senābyūhaṃpi anīkadassanaṃpi gacchanti . aññataropi chabbaggiyo bhikkhu uyyodhikaṃ gantvā kaṇḍena paṭividdho hoti . manussā taṃ bhikkhuṃ upphaṇḍesuṃ kacci bhante suyuddhaṃ ahosi kati te lakkhāni laddhānīti . so bhikkhu tehi manussehi upphaṇḍiyamāno maṅku ahosi . manussā ujjhāyanti khīyanti vipācenti kathaṃ hi nāma samaṇā sakyaputtiyā uyyodhikaṃ dassanāya āgacchissanti amhākampi alābhā amhākampi dulladdhaṃ ye mayaṃ ājīvassa hetu puttadārassa kāraṇā uyyodhikaṃ āgacchāmāti. {571.1} Assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ . ye te bhikkhū appicchā .pe. Te ujjhāyanti khīyanti vipācenti kathaṃ hi nāma chabbaggiyā bhikkhū uyyodhikaṃ dassanāya gacchissantīti .pe. saccaṃ kira tumhe bhikkhave uyyodhikaṃ dassanāya gacchathāti . saccaṃ bhagavāti . Vigarahi buddho bhagavā kathaṃ hi nāma tumhe moghapurisā uyyodhikaṃ dassanāya gacchissatha netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. evañca pana Bhikkhave imaṃ sikkhāpadaṃ uddiseyyātha {571.2} dvirattatirattañce bhikkhu senāya vasamāno uyyodhakaṃ vā balaggaṃ vā senābyūhaṃ vā anīkadassanaṃ vā gaccheyya pācittiyanti.

[572] Dvirattatirattañce bhikkhu senāya vasamānoti dve tisso rattiyo vasamāno . uyyodhikaṃ nāma yattha sampahāro dissati. Balaggaṃ nāma ettakā hatthī ettakā assā ettakā rathā ettakā pattī. Senābyūhaṃ nāma ito hatthī hontu ito assā hontu ito rathā hontu ito pattikā hontu. {572.1} Anīkaṃ nāma hatthānīkaṃ assānīkaṃ rathānīkaṃ pattānīkaṃ. Tayo hatthī pacchimaṃ hatthānīkaṃ . tayo assā pacchimaṃ assānīkaṃ . Tayo rathā pacchimaṃ rathānīkaṃ . cattāro purisā sarahatthā pacchimaṃ pattānīkaṃ.