[579] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena chabbaggiyā bhikkhū sattarasavaggiyaṃ bhikkhuṃ aṅgulipatodakena hāsesuṃ . so bhikkhu uttasanto anassāsako kālamakāsi . ye te bhikkhū appicchā .pe. Te ujjhāyanti khīyanti vipācenti kathaṃ hi nāma chabbaggiyā bhikkhū bhikkhuṃ aṅgulipatodakena hāsessantīti .pe. saccaṃ kira tumhe bhikkhave bhikkhuṃ aṅgulipatodakena hāsethāti . saccaṃ bhagavāti . Vigarahi buddho bhagavā kathaṃ hi nāma tumhe moghapurisā bhikkhuṃ aṅgulipatodakena hāsessatha netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. evañca pana bhikkhave imaṃ sikkhāpadaṃ uddiseyyātha {579.1} aṅgulipatodake pācittiyanti.

[580] Aṅgulipatodako nāma aṅguliyāpi tudanti . Upasampanno upasampannaṃ hassādhippāyo kāyena kāyaṃ āmasati āpatti pācittiyassa.

[581] Upasampanne upasampannasaññī aṅgulipatodakena hāseti āpatti pācittiyassa . upasampanne vematiko aṅgulipatodakena hāseti āpatti pācittiyassa . upasampanne anupasampannasaññī Aṅgulipatodakena hāseti āpatti pācittiyassa.

[582] Kāyena kāyapaṭibaddhaṃ āmasati āpatti dukkaṭassa . Kāyapaṭibaddhena kāyaṃ āmasati āpatti dukkaṭassa . kāyapaṭibaddhena kāyapaṭibaddhaṃ āmasati āpatti dukkaṭassa . nissaggiyena kāyaṃ āmasati āpatti dukkaṭassa . nissaggiyena kāyapaṭibaddhaṃ āmasati āpatti dukkaṭassa . nissaggiyena nissaggiyaṃ āmasati āpatti dukkaṭassa.