[610] Tena samayena buddho bhagavā rājagahe viharati veḷuvane kalandakanivāpe . tena kho pana samayena bhikkhū tapode nhāyanti. Athakho rājā māgadho seniyo bimbisāro sīsaṃ nhāyissāmīti tapodaṃ gantvā yāva ayyā nhāyantīti ekamantaṃ paṭimānesi . Bhikkhū yāva samandhakārā nhāyiṃsu . athakho rājā māgadho seniyo bimbisāro vikāle sīsaṃ nhāyitvā nagaradvāre thakkite bahinagare vasitvā kālasseva asambhinnena vilepanena yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi. {610.1} Ekamantaṃ nisinnaṃ kho rājānaṃ māgadhaṃ seniyaṃ bimbisāraṃ bhagavā etadavoca kissa tvaṃ mahārāja kālasseva āgato asambhinnena vilepanenāti . athakho rājā māgadho seniyo bimbisāro bhagavato etamatthaṃ ārocesi . athakho bhagavā rājānaṃ māgadhaṃ seniyaṃ bimbisāraṃ dhammiyā kathāya sandassesi samādapesi samuttejesi sampahaṃsesi . Athakho rājā māgadho seniyo bimbisāro bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi . athakho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi saccaṃ kira bhikkhave bhikkhū rājānaṃpi passitvā na Mattaṃ jānitvā nhāyantīti . saccaṃ bhagavāti . vigarahi buddho bhagavā kathaṃ hi nāma te bhikkhave moghapurisā rājānaṃpi passitvā na mattaṃ jānitvā nhāyissanti netaṃ bhikkhave appasannānaṃ vā pasādāya pasannānaṃ vā bhiyyobhāvāya .pe. evañca pana bhikkhave imaṃ sikkhāpadaṃ uddiseyyātha {610.2} yo pana bhikkhu orenaḍḍhamāsaṃ nhāyeyya pācittiyanti. {610.3} Evañcidaṃ bhagavatā bhikkhūnaṃ sikkhāpadaṃ paññattaṃ hoti.

[611] Tena kho pana samayena bhikkhū uṇhasamaye pariḷāhasamaye kukkuccāyantā na nhāyanti sedagatena gattena sayanti . cīvaraṃpi senāsanaṃpi dussati . bhagavato etamatthaṃ ārocesuṃ . anujānāmi bhikkhave uṇhasamaye pariḷāhasamaye orenaḍḍhamāsaṃ nhāyituṃ evañca pana bhikkhave imaṃ sikkhāpadaṃ uddiseyyātha {611.1} yo pana bhikkhu orenaḍḍhamāsaṃ nhāyeyya aññatra samayā pācittiyaṃ . tatthāyaṃ samayo diyaḍḍho māso seso gimhānanti vassānassa paṭhamo māso iccete aḍḍhateyyamāsā uṇhasamayo pariḷāhasamayo ayaṃ tattha samayoti. {611.2} Evañcidaṃ bhagavatā bhikkhūnaṃ sikkhāpadaṃ paññattaṃ hoti.