[627] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena sattarasavaggiyā bhikkhū asannihitaparikkhārā honti . chabbaggiyā bhikkhū sattarasavaggiyānaṃ bhikkhūnaṃ pattaṃpi cīvaraṃpi apanidhenti . sattarasavaggiyā bhikkhū chabbaggiye bhikkhū etadavocuṃ dethāvuso amhākaṃ pattaṃpi cīvaraṃpīti . chabbaggiyā bhikkhū hasanti . te rodanti . bhikkhū evamāhaṃsu kissa tumhe āvuso rodathāti . ime āvuso chabbaggiyā bhikkhū amhākaṃ pattaṃpi cīvaraṃpi apanidhentīti. {627.1} Ye te bhikkhū appicchā .pe. Te ujjhāyanti khīyanti vipācenti kathaṃ hi nāma chabbaggiyā bhikkhū bhikkhūnaṃ pattaṃpi cīvaraṃpi apanidhessantīti .pe. saccaṃ kira tumhe bhikkhave bhikkhūnaṃ pattaṃpi cīvaraṃpi apanidhethāti . saccaṃ bhagavāti . vigarahi buddho bhagavā kathaṃ hi nāma tumhe moghapurisā bhikkhūnaṃ pattaṃpi cīvaraṃpi apanidhessatha netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. Evañca pana bhikkhave imaṃ sikkhāpadaṃ uddiseyyātha {627.2} yo pana bhikkhu bhikkhussa pattaṃ vā cīvaraṃ vā nisīdanaṃ vā sūcigharaṃ vā kāyabandhanaṃ vā apanidheyya vā apanidhāpeyya vā antamaso hassāpekkhopi pācittiyanti.

[628] Yo panāti yo yādiso .pe. bhikkhūti .pe. ayaṃ imasmiṃ atthe adhippeto bhikkhūti . bhikkhussāti aññassa bhikkhussa . Patto nāma dve pattā ayopatto mattikāpatto . cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ . nisīdanaṃ nāma sadasaṃ vuccati . sūcigharaṃ nāma sasūcikaṃ vā asūcikaṃ vā. Kāyabandhanaṃ nāma dve kāyabandhanāni paṭṭikaṃ sūkarantakaṃ . apanidheyyāti sayaṃ apanidheti āpatti pācittiyassa . apanidhāpeyyāti aññaṃ āṇāpeti āpatti pācittiyassa . sakiṃ āṇatto bahukaṃpi apanidheti āpatti pācittiyassa . antamaso hassāpekkhopīti kīḷādhippāyo.