[658] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena aññataro bhikkhu kosalesu janapadesu sāvatthiṃ gacchanto aññatarena gāmadvārena atikkamati . aññatarā itthī sāmikena saha bhaṇḍitvā gāmato nikkhamitvā taṃ bhikkhuṃ passitvā etadavoca kahaṃ bhante ayyo gamissatīti . sāvatthiṃ kho ahaṃ bhagini gamissāmīti . ahaṃ ayyena saddhiṃ gamissāmīti . eyyāsi bhaginīti . athakho tassā itthiyā sāmiko gāmato nikkhamitvā manusse pucchi apayyā evarūpaṃ itthiṃ passeyyāthāti. Esayya pabbajitena saha gacchatīti. {658.1} Athakho so puriso anubandhitvā taṃ bhikkhuṃ gahetvā ākoṭetvā muñci . athakho so bhikkhu aññatarasmiṃ rukkhamūle padhūpento nisīdi . athakho sā itthī taṃ purisaṃ etadavoca nāyya so bhikkhu maṃ nippādesi apica ahameva tena bhikkhunā saddhiṃ gacchāmi akārako so bhikkhu gaccha naṃ khamāpehīti . athakho so puriso taṃ bhikkhuṃ khamāpesi . athakho so bhikkhu sāvatthiṃ gantvā bhikkhūnaṃ etamatthaṃ ārocesi . ye te bhikkhū appicchā .pe. te ujjhāyanti khīyanti vipācenti kathaṃ hi nāma bhikkhu mātugāmena saddhiṃ saṃvidhāya ekaddhānamaggaṃ paṭipajjissatīti .pe. saccaṃ kira tvaṃ bhikkhu Mātugāmena saddhiṃ saṃvidhāya ekaddhānamaggaṃ paṭipajjasīti . saccaṃ bhagavāti . vigarahi buddho bhagavā kathaṃ hi nāma tvaṃ moghapurisa mātugāmena saddhiṃ saṃvidhāya ekaddhānamaggaṃ paṭipajjissasi netaṃ moghapurisa appasannānaṃ vā pasādāya pasannānaṃ vā bhiyyobhāvāya .pe. Evañca pana bhikkhave imaṃ sikkhāpadaṃ uddiseyyātha {658.2} yo pana bhikkhu mātugāmena saddhiṃ saṃvidhāya ekaddhānamaggaṃ paṭipajjeyya antamaso gāmantarampi pācittiyanti.

[659] Yo panāti yo yādiso .pe. Bhikkhūti .pe. Ayaṃ imasmiṃ atthe adhippeto bhikkhūti . mātugāmo nāma manussitthī na yakkhī na petī na tiracchānagatā viññū paṭibalā subhāsitadubbhāsitaṃ duṭṭhullāduṭṭhullaṃ ājānituṃ . saddhinti ekato . saṃvidhāyāti gacchāma bhagini gacchāma ayya gacchāma ayya gacchāma bhagini ajja vā hiyyo vā pare vā gacchāmāti saṃvidahati āpatti dukkaṭassa . Antamaso gāmantarampīti kukkuṭasampāte gāme gāmantare gāmantare āpatti pācittiyassa . agāmake araññe aḍḍhayojane aḍḍhayojane āpatti pācittiyassa.