[763] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena bhagavatā bhikkhūnaṃ nisīdanaṃ anuññātaṃ hoti . chabbaggiyā bhikkhū bhagavatā nisīdanaṃ anuññātanti appamāṇikāni nisīdanāni dhārenti mañcassapi pīṭhassapi puratopi pacchatopi olambenti . ye te bhikkhū appicchā .pe. te ujjhāyanti khīyanti vipācenti kathaṃ hi nāma chabbaggiyā bhikkhū appamāṇikāni nisīdanāni dhāressantīti .pe. saccaṃ kira tumhe bhikkhave appamāṇikāni nisīdanāni dhārethāti . saccaṃ bhagavāti . Vigarahi buddho bhagavā kathaṃ hi nāma tumhe moghapurisā appamāṇikāni nisīdanāni dhāressatha netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. evañca pana bhikkhave imaṃ sikkhāpadaṃ uddiseyyātha {763.1} nisīdanaṃ pana bhikkhunā kārayamānena pamāṇikaṃ kāretabbaṃ . tatridaṃ pamāṇaṃ dīghaso dve vidatthiyo sugatavidatthiyā tiriyaṃ diyaḍḍhaṃ. Taṃ atikkāmayato chedanakaṃ pācittiyanti. {763.2} Evañcidaṃ bhagavatā bhikkhūnaṃ sikkhāpadaṃ paññattaṃ hoti.

[764] Tena kho pana samayena āyasmā udāyi mahākāyo hoti. So bhagavato purato nisīdanaṃ paññāpetvā samantato samañchamāno nisīdati . athakho bhagavā āyasmantaṃ udāyiṃ etadavoca Kissa tvaṃ udāyi nisīdanaṃ paññāpetvā samantato samañchasi seyyathāpi purāṇasikoṭṭhoti . tathā hi pana bhante bhagavatā bhikkhūnaṃ atikhuddakaṃ nisīdanaṃ anuññātanti . athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave nisīdanassa dasā vidatthiṃ evañca pana bhikkhave imaṃ sikkhāpadaṃ uddiseyyātha {764.1} nisīdanaṃ pana bhikkhunā kārayamānena pamāṇikaṃ kāretabbaṃ. Tatrīdaṃ pamāṇaṃ dīghaso dve vidatthiyo sugatavidatthiyā tiriyaṃ diyaḍḍhaṃ dasā vidatthi. Taṃ atikkāmayato chedanakaṃ pācittiyanti.

[765] Nisīdanaṃ nāma sadasaṃ vuccati . kārayamānenāti karonto vā kārāpento vā . pamāṇikaṃ kāretabbaṃ . tatridaṃ pamāṇaṃ dīghaso dve vidatthiyo sugatavidatthiyā tiriyaṃ diyaḍḍhaṃ dasā vidatthi . Taṃ atikkāmetvā karoti vā kārāpeti vā payoge dukkaṭaṃ paṭilābhena chinditvā pācittiyaṃ desetabbaṃ.