[289] Tena samayena buddho bhagavā āḷaviyaṃ viharati aggāḷave cetiye . tena kho pana samayena upāsakā ārāmaṃ āgacchanti dhammassavanāya . dhamme bhāsite therā bhikkhū yathāvihāraṃ gacchanti . Navakā bhikkhū tattheva upaṭṭhānasālāyaṃ upāsakehi saddhiṃ muṭṭhassatī asampajānā naggā vikujjamānā kākacchamānā seyyaṃ kappenti. Upāsakā ujjhāyanti khīyanti vipācenti kathaṃ hi nāma bhaddantā muṭṭhassatī asampajānā naggā vikujjamānā kākacchamānā seyyaṃ kappessantīti . assosuṃ kho bhikkhū tesaṃ upāsakānaṃ ujjhāyantānaṃ khīyantānaṃ vipācentānaṃ . ye te bhikkhū appicchā .pe. Te ujjhāyanti khīyanti vipācenti kathaṃ hi nāma bhikkhū anupasampannena saha seyyaṃ kappessantīti . athakho te bhikkhū bhagavato etamatthaṃ ārocesuṃ .pe. Saccaṃ kira bhikkhave bhikkhū anupasampannena saha seyyaṃ kappentīti . Saccaṃ bhagavāti . vigarahi buddho bhagavā kathaṃ hi nāma te bhikkhave moghapurisā anupasampannena saha seyyaṃ kappessanti netaṃ bhikkhave appasannānaṃ vā pasādāya .pe. evañca pana bhikkhave imaṃ sikkhāpadaṃ uddiseyyātha {289.1} yo pana bhikkhu anupasampannena saha seyyaṃ kappeyya pācittiyanti. {289.2} Evañcidaṃ bhagavatā bhikkhūnaṃ sikkhāpadaṃ paññattaṃ hoti.

[290] Athakho bhagavā āḷaviyaṃ yathābhirantaṃ viharitvā yena kosambī tena cārikaṃ pakkāmi anupubbena cārikaṃ caramāno yena kosambī tadavasari. Tatra sudaṃ bhagavā kosambiyaṃ viharati badarikārāme . bhikkhū āyasmantaṃ rāhulaṃ etadavocuṃ bhagavatā āvuso rāhula sikkhāpadaṃ paññattaṃ na anupasampannena saha seyyā kappetabbāti seyyaṃ āvuso rāhula jānāhīti . athakho āyasmā rāhulo seyyaṃ alabhamāno vaccakuṭiyā seyyaṃ kappesi . athakho bhagavā rattiyā paccūsasamayaṃ paccuṭṭhāya yena vaccakuṭī tenupasaṅkami upasaṅkamitvā ukkāsi . āyasmāpi rāhulo ukkāsi . ko etthāti . Ahaṃ bhagavā rāhuloti. Kissa tvaṃ rāhula idha nipannosīti . athakho āyasmā rāhulo bhagavato etamatthaṃ ārocesi . athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave anupasampannena dvirattatirattaṃ saha seyyaṃ kappetuṃ . evañca pana bhikkhave imaṃ sikkhāpadaṃ uddiseyyātha {290.1} yo pana bhikkhu anupasampannena uttaridvirattatirattaṃ saha seyyaṃ kappeyya pācittiyanti.