[42] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena āyasmato udāyissa purāṇadutiyikā bhikkhunīsu pabbajitā hoti . sā bhikkhunī āyasmato udāyissa santike abhikkhaṇaṃ āgacchati . āyasmāpi udāyi tassā bhikkhuniyā santike abhikkhaṇaṃ gacchati . Tena kho pana samayena āyasmā udāyi tassā bhikkhuniyā santike bhattavissaggaṃ karoti . athakho āyasmā udāyi pubbaṇhasamayaṃ nivāsetvā pattacīvaramādāya yena sā bhikkhunī tenupasaṅkami upasaṅkamitvā tassā bhikkhuniyā purato aṅgajātaṃ vivaritvā āsane nisīdi . Sāpi kho bhikkhunī āyasmato udāyissa purato aṅgajātaṃ vivaritvā āsane nisīdi. {42.1} Athakho āyasmā udāyi sāratto va tassā bhikkhuniyā aṅgajātaṃ upanijjhāyi . tassa aṅgajātato asuci mucci . Athakho āyasmā udāyi taṃ bhikkhuniṃ etadavoca gaccha bhagini udakaṃ āhara antaravāsakaṃ dhovissāmīti . āharayya ahameva dhovissāmīti. Athakho sā bhikkhunī tassa taṃ asuciṃ ekadesaṃ mukhena aggahesi ekadesaṃ aṅgajāte pakkhipi . sā tena gabbhaṃ gaṇhi . Bhikkhuniyo evamāhaṃsu ayaṃ bhikkhunī abrahmacārinī ayaṃ gabbhinīti . Nāhaṃ ayye abrahmacārinīti . athakho sā bhikkhunī bhikkhunīnaṃ etamatthaṃ ārocesi . bhikkhuniyo ujjhāyanti khīyanti vipācenti kathaṃ hi nāma ayyo udāyi bhikkhuniyā purāṇacīvaraṃ dhovāpessatīti . Athakho tā bhikkhuniyo bhikkhūnaṃ etamatthaṃ ārocesuṃ . ye te bhikkhū appicchā .pe. te ujjhāyanti khīyanti vipācenti kathaṃ hi nāma āyasmā udāyi bhikkhuniyā purāṇacīvaraṃ dhovāpessatīti . athakho te bhikkhū [3]- bhagavato etamatthaṃ ārocesuṃ. {42.2} Athakho bhagavā .pe. āyasmantaṃ udāyiṃ paṭipucchi saccaṃ kira tvaṃ udāyi bhikkhuniyā purāṇacīvaraṃ dhovāpesīti . saccaṃ bhagavāti. Ñātikā te udāyi aññātikāti . aññātikā bhagavāti . Aññātako moghapurisa aññātikāya na jānāti paṭirūpaṃ vā appaṭirūpaṃ vā pāsādikaṃ vā appāsādikaṃ vā tattha hi nāma tvaṃ moghapurisa aññātikāya bhikkhuniyā purāṇacīvaraṃ dhovāpessasi netaṃ moghapurisa appasannānaṃ vā pasādāya pasannānaṃ vā bhiyyobhāvāya .pe. Evañca pana bhikkhave imaṃ sikkhāpadaṃ uddiseyyātha {42.3} yo pana bhikkhu aññātikāya bhikkhuniyā purāṇacīvaraṃ dhovāpeyya vā rajāpeyya vā ākoṭāpeyya vā nissaggiyaṃ pācittiyanti.