[374] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena bhikkhū hemantike kāle ajjhokāse senāsanaṃ paññāpetvā kāyaṃ otāpentā kāle ārocite taṃ pakkamantā neva uddhariṃsu na uddharāpesuṃ anāpucchā pakkamiṃsu . senāsanaṃ ovaṭṭhaṃ hoti . ye te bhikkhū appicchā .pe. Te ujjhāyanti khīyanti vipācenti kathaṃ hi nāma bhikkhū ajjhokāse senāsanaṃ paññāpetvā taṃ pakkamantā neva uddharissanti na uddharāpessanti anāpucchā pakkamissanti senāsanaṃ ovaṭṭhanti. {374.1} Athakho te bhikkhū bhagavato etamatthaṃ ārocesuṃ. Athakho bhagavā bhikkhū paṭipucchi saccaṃ kira bhikkhave bhikkhū ajjhokāse senāsanaṃ paññāpetvā taṃ pakkamantā neva uddharanti na uddharāpenti anāpucchā pakkamanti senāsanaṃ ovaṭṭhanti . saccaṃ bhagavāti . Vigarahi buddho bhagavā kathaṃ hi nāma te bhikkhave moghapurisā ajjhokāse senāsanaṃ paññāpetvā taṃ pakkamantā neva uddharissanti na uddharāpessanti anāpucchā pakkamissanti . senāsanaṃ ovaṭṭhaṃ netaṃ bhikkhave appasannānaṃ vā pasādāya .pe. evañca pana bhikkhave imaṃ sikkhāpadaṃ uddiseyyātha {374.2} yo pana bhikkhu saṅghikaṃ mañcaṃ vā pīṭhaṃ vā bhisiṃ vā kocchaṃ vā Ajjhokāse santharitvā vā santharāpetvā vā taṃ pakkamanto neva uddhareyya na uddharāpeyya anāpucchaṃ vā gaccheyya pācittiyanti. {374.3} Evañcidaṃ bhagavatā bhikkhūnaṃ sikkhāpadaṃ paññattaṃ hoti.

[375] Tena kho pana samayena bhikkhū ajjhokāse vasitvā kālasseva senāsanaṃ atiharanti . addasā kho bhagavā te bhikkhū kālasseva senāsanaṃ atiharante . disvāna etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave aṭṭha māse avassikasaṅkete maṇḍape vā rukkhamūle vā yattha kākā vā kulalā vā na ūhadanti tattheva senāsanaṃ nikkhipitunti.

[376] Yo panāti yo yādiso .pe. Bhikkhūti .pe. Ayaṃ imasmiṃ atthe adhippeto bhikkhūti . saṅghikaṃ nāma saṅghassa dinnaṃ hoti pariccattaṃ . mañco nāma cattāro mañcā masārako bundikābaddho kulirapādako āhaccapādako . pīṭhaṃ nāma cattāri pīṭhāni masārakaṃ bundikābaddhaṃ kulirapādakaṃ āhaccapādakaṃ . bhisi nāma pañca bhisiyo uṇṇabhisi vākabhisi colabhisi tiṇabhisi paṇṇabhisi . kocchaṃ nāma vākamayaṃ vā usīramayaṃ vā muñjamayaṃ vā pabbajamayaṃ vā anto saṃveṭhetvā baddhaṃ hoti . santharitvāti sayaṃ santharitvā . Santharāpetvāti aññaṃ santharāpetvā . anupasampannaṃ santharāpeti Tassa palibodho . upasampannaṃ santharāpeti santhārakassa palibodho . Taṃ pakkamanto neva uddhareyyāti na sayaṃ uddhareyya. Na uddharāpeyyāti na aññaṃ uddharāpeyya . anāpucchaṃ vā gaccheyyāti bhikkhuṃ vā sāmaṇeraṃ vā ārāmikaṃ vā anāpucchā majjhimassa purisassa leḍḍupātaṃ atikkamantassa āpatti pācittiyassa.