[434] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena therā bhikkhū bhikkhuniyo ovadantā lābhino honti cīvarapiṇḍapātasenāsana- gilānapaccayabhesajjaparikkhārānaṃ . chabbaggiyā bhikkhū evaṃ vadenti na bahukatā therā bhikkhū bhikkhuniyo ovadituṃ āmisahetu therā bhikkhū bhikkhuniyo ovadantīti . ye te bhikkhū appicchā .pe. Te ujjhāyanti khīyanti vipācenti kathaṃ hi nāma chabbaggiyā bhikkhū evaṃ vakkhanti na bahukatā therā bhikkhū bhikkhuniyo ovadituṃ āmisahetu therā bhikkhū bhikkhuniyo ovadantīti .pe. saccaṃ kira tumhe bhikkhave evaṃ vadetha na bahukatā therā bhikkhū bhikkhuniyo ovadituṃ āmisahetu therā bhikkhū bhikkhuniyo ovadantīti . saccaṃ bhagavāti . vigarahi buddho bhagavā kathaṃ nāma tumhe moghapurisā evaṃ vakkhatha na bahukatā therā bhikkhū bhikkhuniyo ovadituṃ āmisahetu therā bhikkhū bhikkhuniyo ovadantīti netaṃ moghapurisā appasannānaṃ vā pasādāya .pe. evañca pana bhikkhave imaṃ sikkhāpadaṃ uddiseyyātha {434.1} yo pana bhikkhu evaṃ vadeyya āmisahetu [2]- bhikkhū bhikkhuniyo ovadantīti pācittiyanti.

[435] Yo panāti yo yādiso .pe. Bhikkhūti .pe. Ayaṃ imasmiṃ atthe adhippeto bhikkhūti . āmisahetūti cīvarahetu piṇḍapātahetu senāsanahetu gilānapaccayabhesajjaparikkhārahetu sakkārahetu garukārahetu mānanahetu vandanahetu pūjanahetu.

[436] Evaṃ vadeyyāti upasampannaṃ saṅghena sammataṃ bhikkhunovādakaṃ avaṇṇaṃ kattukāmo ayasaṃ kattukāmo maṅkukattukāmo evaṃ vadeti cīvarahetu piṇḍapātahetu senāsanahetu gilānapaccayabhesajja- parikkhārahetu sakkārahetu garukārahetu mānanahetu vandanahetu pūjanahetu ovadatīti bhaṇati āpatti pācittiyassa.

[437] Dhammakamme dhammakammasaññī evaṃ vadeti āpatti pācittiyassa . dhammakamme vematiko evaṃ vadeti āpatti pācittiyassa . dhammakamme adhammakammasaññī evaṃ vadeti āpatti pācittiyassa.