[456] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena chabbaggiyā bhikkhū bhikkhunīhi saddhiṃ saṃvidhāya ekanāvaṃ abhirūhanti . manussā ujjhāyanti khīyanti vipācenti yatheva mayaṃ sappajāpatikā ekanāvāya kīḷāma evamevime samaṇā sakyaputtiyā bhikkhunīhi saddhiṃ saṃvidhāya ekanāvāya kīḷantīti . assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ . ye te bhikkhū appicchā .pe. te ujjhāyanti khīyanti vipācenti kathaṃ hi nāma chabbaggiyā bhikkhū bhikkhunīhi saddhiṃ saṃvidhāya ekanāvaṃ abhirūhissantīti. {456.1} Athakho ge bhikkhū bhagavato etamatthaṃ ārocesuṃ . Athakho bhagavā chabbaggiye bhikkhū paṭipucchi saccaṃ kira tumhe bhikkhave bhikkhunīhi saddhiṃ saṃvidhāya ekanāvaṃ abhirūhathāti . saccaṃ bhagavāti . Vigarahi buddho bhagavā kathaṃ hi nāma tumhe moghapurisā bhikkhunīhi saddhiṃ saṃvidhāya ekanāvaṃ abhirūhissatha netaṃ moghapurisā appasannānaṃ vā pasādāya .pe. Evañca pana bhikkhave imaṃ sikkhāpadaṃ uddiseyyātha {456.2} yo pana bhikkhu bhikkhuniyā saddhiṃ saṃvidhāya ekanāvaṃ abhirūheyya uddhagāminiṃ vā Adhogāminiṃ vā pācittiyanti. {456.3} Evañcidaṃ bhagavatā bhikkhūnaṃ sikkhāpadaṃ paññattaṃ hoti.

[457] Tena kho pana samayena sambahulā bhikkhū ca bhikkhuniyo ca sāketā sāvatthiṃ addhānamaggapaṭipannā honti . antarāmagge nadī uttaritabbā hoti . athakho tā bhikkhuniyo te bhikkhū etadavocuṃ mayaṃpi ayyehi saddhiṃ uttarissāmāti . na bhagini kappati bhikkhuniyā saddhiṃ saṃvidhāya ekanāvaṃ abhirūhituṃ tumhe vā paṭhamaṃ uttaratha mayaṃ vā uttarissāmāti . ayyā bhante aggapurisā ayyā va paṭhamaṃ uttarantūti . athakho tāsaṃ bhikkhunīnaṃ pacchā uttarantīnaṃ corā acchindiṃsu ceva dūsesuñca. {457.1} Athakho tā bhikkhuniyo sāvatthiṃ gantvā bhikkhunīnaṃ etamatthaṃ ārocesuṃ . bhikkhuniyo bhikkhūnaṃ etamatthaṃ ārocesuṃ . Bhikkhū bhagavato etamatthaṃ ārocesuṃ . athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave tiriyantaraṇāya bhikkhuniyā saddhiṃ saṃvidhāya ekanāvaṃ abhirūhituṃ evañca pana bhikkhave imaṃ sikkhāpadaṃ uddiseyyātha {457.2} yo pana bhikkhu bhikkhuniyā saddhiṃ saṃvidhāya ekanāvaṃ abhirūheyya uddhagāminiṃ vā adhogāminiṃ vā aññatra tiriyantaraṇāya pācittiyanti.