[34] Niṭṭhitacīvarasmiṃ bhikkhunāti bhikkhuno cīvaraṃ kataṃ vā hoti naṭṭhaṃ vā vinaṭṭhaṃ vā daḍḍhaṃ vā cīvarāsā vā upacchinnā . ubbhatasmiṃ kaṭhineti aṭṭhannaṃ mātikānaṃ aññatarāya mātikāya ubbhataṃ hoti saṅghena vā antarā ubbhataṃ hoti . akālacīvaraṃ nāma anatthate kaṭhine ekādasamāse uppannaṃ atthate kaṭhine sattamāse uppannaṃ kālepi ādissa dinnaṃ etaṃ akālacīvaraṃ nāma . uppajjeyyāti uppajjeyya saṅghato vā gaṇato vā ñātito vā mittato vā paṃsukūlato vā attano vā dhanena.

[35] Ākaṅkhamānenāti icchamānena paṭiggahetabbaṃ . Paṭiggahetvā khippameva kāretabbanti dasāhā kāretabbaṃ.

[36] No cassa pāripūrīti kayiramānaṃ nappahoti. Māsaparamantena bhikkhunā taṃ cīvaraṃ nikkhipitabbanti māsaparamatā nikkhipitabbaṃ . ūnassa pāripūriyāti ūnassa pāripūratthāya . satiyā paccāsāyāti paccāsā hoti saṅghato vā gaṇato vā ñātito vā mittato vā paṃsukūlato vā attano vā dhanena.

[37] Tato ce uttariṃ nikkhipeyya satiyāpi paccāsāyāti Tadahuppanne mūlacīvare paccāsācīvaraṃ uppajjati dasāhā kāretabbaṃ . Dvīhuppanne mūlacīvare ... Tīhuppanne mūlacīvare ... Catūhuppanne mūlacīvare ... Pañcāhuppanne mūlacīvare ... Chāhuppanne mūlacīvare ... Sattāhuppanne mūlacīvare ... aṭṭhāhuppanne mūlacīvare ... Navāhuppanne mūlacīvare ... Dasāhuppanne mūlacīvare ... Paccāsācīvaraṃ uppajjati dasāhā kāretabbaṃ. Ekādase uppanne mūlacīvare ... Dvādase uppanne mūlacīvare ... Terase uppanne mūlacīvare ... Cuddase uppanne mūlacīvare ... Paṇṇarase uppanne mūlacīvare ... Soḷase uppanne mūlacīvare ... Sattarase uppanne mūlacīvare ... Aṭṭhārase uppanne mūlacīvare ... Ekūnavīse uppanne mūlacīvare ... Vīse uppanne mūlacīvare paccāsācīvaraṃ uppajjati dasāhā kāretabbaṃ . Ekavīse uppanne mūlacīvare paccāsācīvaraṃ uppajjati navāhā kāretabbaṃ . dvāvīse uppanne mūlacīvare paccāsācīvaraṃ uppajjati aṭṭhāhā kāretabbaṃ . tevīse uppanne mūlacīvare ... sattāhā kāretabbaṃ . catuvīse uppanne mūlacīvare ... chāhā kāretabbaṃ. Pañcavīse uppanne mūlacīvare ... pañcāhā kāretabbaṃ . chabbīse uppanne mūlacīvare ... catūhā kāretabbaṃ . sattavīse uppanne mūlacīvare ... Tīhā kāretabbaṃ. Aṭṭhavīse uppanne mūlacīvare ... Dvīhā kāretabbaṃ . ekūnatiṃse uppanne mūlacīvare paccāsācīvaraṃ uppajjati ekāhaṃ kāretabbaṃ . tiṃse uppanne mūlacīvare paccāsācīvaraṃ Uppajjati tadaheva adhiṭṭhātabbaṃ vikappetabbaṃ vissajjetabbaṃ . No ce adhiṭṭhaheyya vā vikappeyya vā vissajjeyya vā ekatiṃse aruṇuggamane nissaggiyaṃ hoti nissajjitabbaṃ saṅghassa vā gaṇassa vā puggalassa vā . evañca pana bhikkhave nissajjitabbaṃ .pe. idaṃ me bhante akālacīvaraṃ māsātikkantaṃ nissaggiyaṃ imāhaṃ saṅghassa nissajjāmīti .pe. dadeyyāti .pe. dadeyyunti .pe. āyasmato dammīti.