[360] Tena kho pana samayena āyasmā channo saṅghamajjhe āpattiyā anuyuñjiyamāno aññenaññaṃ paṭicaranto āpattiṃ āpajjissāmīti tuṇhībhūto saṅghaṃ viheseti . ye te bhikkhū appicchā .pe. te ujjhāyanti khīyanti vipācenti kathaṃ hi nāma āyasmā channo saṅghamajjhe āpattiyā anuyuñjiyamāno tuṇhībhūto saṅghaṃ Vihesessatīti . athakho te bhikkhū bhagavato etamatthaṃ ārocesuṃ .pe. Athakho bhagavā āyasmantaṃ channaṃ paṭipucchi saccaṃ kira tvaṃ channa saṅghamajjhe āpattiyā anuyuñjiyamāno tuṇhībhūto saṅghaṃ vihesesīti . Saccaṃ bhagavāti . vigarahi buddho bhagavā kathaṃ hi nāma tvaṃ moghapurisa saṅghamajjhe āpattiyā anuyuñjiyamāno tuṇhībhūto saṅghaṃ vihesessasi netaṃ moghapurisa appasannānaṃ vā pasādāya .pe. Vigarahitvā dhammiṃ kathaṃ katvā bhikkhū āmantesi tenahi bhikkhave saṅgho channassa bhikkhuno vihesakaṃ ropetu . evañca pana bhikkhave ropetabbaṃ byattena bhikkhunā paṭibalena saṅgho ñāpetabbo {360.1} suṇātu me bhante saṅgho ayaṃ channo bhikkhu saṅghamajjhe āpattiyā anuyuñjiyamāno tuṇhībhūto saṅghaṃ viheseti . yadi saṅghassa pattakallaṃ saṅgho channassa bhikkhuno vihesakaṃ ropeyya. Esā ñatti. {360.2} Suṇātu me bhante saṅgho ayaṃ channo bhikkhu saṅghamajjhe āpattiyā anuyuñjiyamāno tuṇhībhūto saṅghaṃ viheseti . saṅgho channassa bhikkhuno vihesakaṃ ropeti . yassāyasmato khamati channassa bhikkhuno vihesakassa ropanā so tuṇhassa yassa nakkhamati so bhāseyya. {360.3} Ropitaṃ saṅghena channassa bhikkhuno vihesakaṃ. Khamati saṅghassa tasmā tuṇhī. Evametaṃ dhārayāmīti.

[361] Athakho bhagavā āyasmantaṃ channaṃ anekapariyāyena vigarahitvā Dubbharatāya .pe. Evañca pana bhikkhave imaṃ sikkhāpadaṃ uddiseyyātha {361.1} aññavādake vihesake pācittiyanti.

[362] Aññavādako nāma saṅghamajjhe vatthusmiṃ vā āpattiyā vā anuyuñjiyamāno taṃ na kathetukāmo taṃ na ugghāṭetukāmo aññenaññaṃ paṭicarati ko āpanno kiṃ āpanno kismiṃ āpanno kathaṃ āpanno kaṃ bhaṇatha kiṃ bhaṇathāti eso aññavādako nāma.