[402] Tena samayena buddho bhagavā āḷaviyaṃ viharati aggāḷave cetiye . tena kho pana samayena āḷavikā bhikkhū navakammaṃ karontā jānaṃ sappāṇakaṃ udakaṃ tiṇampi mattikampi siñcantipi siñcāpentipi . Ye te bhikkhū appicchā .pe. te ujjhāyanti khīyanti vipācenti kathaṃ hi nāma āḷavikā bhikkhū jānaṃ sappāṇakaṃ udakaṃ tiṇampi mattikampi siñcissantipi siñcāpessantipīti . athakho te bhikkhū bhagavato etamatthaṃ ārocesuṃ .pe. saccaṃ kira tumhe bhikkhave jānaṃ sappāṇakaṃ udakaṃ tiṇampi mattikampi siñcathapi siñcāpethapīti . Saccaṃ bhagavāti . vigarahi buddho bhagavā kathaṃ hi nāma tumhe moghapurisā jānaṃ sappāṇakaṃ udakaṃ tiṇampi mattikampi sañcissathapi siñcāpessathapi netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. evañca pana bhikkhave imaṃ sikkhāpadaṃ uddiseyyātha {402.1} yo pana bhikkhu jānaṃ sappāṇakaṃ udakaṃ tiṇaṃ vā mattikaṃ vā siñceyya vā siñcāpeyya vā pācittiyanti.

[403] Yo panāti yo yādiso .pe. Bhikkhūti .pe. Ayaṃ imasmiṃ atthe adhippeto bhikkhūti . jānaṃ nāma sāmaṃ vā jānāti aññe vā tassa ārocenti.

[404] Siñceyyāti sayaṃ siñcati āpatti pācittiyassa . Siñcāpeyyāti aññaṃ āṇāpeti āpatti pācittiyassa . sakiṃ āṇatto bahukaṃpi siñcati āpatti pācittiyassa . sappāṇake sappāṇakasaññī tiṇaṃ vā mattikaṃ vā siñcati vā siñcāpeti vā āpatti pācittiyassa . sappāṇake vematiko tiṇaṃ vā mattikaṃ vā siñcati vā siñcāpeti vā āpatti dukkaṭassa . Sappāṇake appāṇakasaññī tiṇaṃ vā mattikaṃ vā siñcati vā siñcāpeti vā anāpatti . appāṇake sappāṇakasaññī āpatti dukkaṭassa . appāṇake vematiko āpatti dukkaṭassa . Appāṇake appāṇakasaññī anāpatti.

[405] Anāpatti asañcicca asatiyā ajānantassa ummattakassa ādikammikassāti. Dasamasikkhāpadaṃ niṭṭhitaṃ. Bhūtagāmavaggo dutiyo. ------- Tassuddānaṃ bhūtaṃ aññāya ujjhāyaṃ pakkamantena te duve pubbe nikkaḍḍhanāhacca dvāraṃ sappāṇakena cāti. -------