[424] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena therā bhikkhū bhikkhuniyo ovadanti pariyāyena . tena kho pana samayena āyasmato cūḷapanthakassa pariyāyo hoti bhikkhuniyo ovadituṃ . bhikkhuniyo evamāhaṃsu nadāni ajja ovādo iddho bhavissati taññevadāni udānaṃ ayyo cūḷapanthako punappunaṃ bhaṇissatīti . athakho tā bhikkhuniyo yenāyasmā cūḷapanthako tenupasaṅkamiṃsu upasaṅkamitvā āyasmantaṃ cūḷapanthakaṃ abhivādetvā ekamantaṃ nisīdiṃsu . ekamantaṃ nisinnā kho tā bhikkhuniyo āyasmā cūḷapanthako etadavoca samaggattha bhaginiyoti . samaggamhāyyāti . vattanti bhaginiyo aṭṭha garudhammāti . vattanti ayyāti . eso bhaginiyo ovādoti niyyādetvā imaṃ udānaṃ punappunaṃ abhāsi adhicetaso appamajjato munino monapathesu sikkhato sokā na bhavanti tādino upasantassa sadā satīmatoti.

[425] Bhikkhuniyo evamāhaṃsu nanu avocumhā nadāni ajja ovādo iddho bhavissati taññevadāni udānaṃ ayyo cūḷapanthako Punappunaṃ bhaṇissatīti . assosi kho āyasmā cūḷapanthako tāsaṃ bhikkhunīnaṃ imaṃ kathāsallāpaṃ . athakho āyasmā cūḷapanthako vehāsaṃ abbhuggantvā ākāse antalikkhe caṅkamatipi tiṭṭhatipi nisīdatipi seyyaṃpi kappeti dhūmāyatipi pajjalatipi antaradhāyatipi taññeva udānaṃ bhaṇati aññañca bahuṃ buddhavacanaṃ . bhikkhuniyo evamāhaṃsu acchariyaṃ vata bho abbhutaṃ vata bho na vata no ito pubbe ovādo evaṃ iddho bhūtapubbo yathā ayyassa cūḷapanthakassāti . athakho āyasmā cūḷapanthako tā bhikkhuniyo yāva samandhakārā ovaditvā uyyojesi gacchatha bhaginiyoti. {425.1} Athakho tā bhikkhuniyo nagaradvāre thakkite bahinagare vasitvā kālasseva nagaraṃ pavisanti . manussā ujjhāyanti khīyanti vipācenti abrahmacāriniyo imā bhikkhuniyo ārāme bhikkhūhi saddhiṃ vasitvā idāni nagaraṃ pavisantīti . assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ . ye te bhikkhū appicchā .pe. te ujjhāyanti khīyanti vipācenti kathaṃ hi nāma āyasmā cūḷapanthako atthaṅgate suriye bhikkhuniyo ovadissatīti .pe. Saccaṃ kira tvaṃ cūḷapanthaka atthaṅgate suriye bhikkhuniyo ovadasīti . Saccaṃ bhagavāti . vigarahi buddho bhagavā kathaṃ hi nāma tvaṃ cūḷapanthaka atthaṅgate suriye bhikkhuniyo ovadissasi netaṃ cūḷapanthaka appasannānaṃ vā pasādāya .pe. Evañca pana bhikkhave imaṃ sikkhāpadaṃ uddiseyyātha