[429] Tena samayena buddho bhagavā sakkesu viharati kapilavatthusmiṃ nigrodhārāme . tena kho pana samayena chabbaggiyā bhikkhū bhikkhunūpassayaṃ upasaṅkamitvā chabbaggiyā bhikkhuniyo ovadanti . bhikkhuniyo chabbaggiyā bhikkhuniyo etadavocuṃ etha ayye ovādaṃ gamissāmāti. Yampi mayaṃ ayye gaccheyyāma ovādassa kāraṇā ayyā chabbaggiyā idheva amhe ovadantīti . bhikkhuniyo ujjhāyanti khīyanti vipācenti kathaṃ hi nāma chabbaggiyā bhikkhū bhikkhunūpassayaṃ upasaṅkamitvā bhikkhuniyo ovadantīti [2]- . athakho tā bhikkhuniyo bhikkhūnaṃ etamatthaṃ ārocesuṃ. Ye te bhikkhū appicchā .pe. te ujjhāyanti khīyanti vipācenti kathaṃ hi nāma chabbaggiyā bhikkhū bhikkhunūpassayaṃ upasaṅkamitvā bhikkhuniyo ovadantīti .pe. saccaṃ kira tumhe bhikkhave bhikkhunūpassayaṃ upasaṅkamitvā bhikkhuniyo ovadathāti . saccaṃ bhagavāti . vigarahi buddho bhagavā kathaṃ hi nāma tumhe moghapurisā bhikkhunūpassayaṃ upasaṅkamitvā bhikkhuniyo ovadissatha netaṃ moghapurisā appasannānaṃ vā pasādāya .pe. Evañca pana bhikkhave imaṃ sikkhāpadaṃ uddiseyyātha {429.1} yo pana bhikkhu bhikkhunūpassayaṃ upasaṅkamitvā bhikkhuniyo ovadeyya pācittiyanti.

[430] Tena kho pana samayena mahāpajāpati gotamī gilānā hoti. Therā bhikkhū yena mahāpajāpati gotamī tenupasaṅkamiṃsu upasaṅkamitvā mahāpajāpatiṃ gotamiṃ etadavocuṃ kacci te gotami khamanīyaṃ kacci yāpanīyanti. Na me ayyā khamanīyaṃ na yāpanīyaṃ iṅghayyā dhammaṃ desethāti. Na tāva bhagini kappati bhikkhunūpassayaṃ upasaṅkamitvā bhikkhuniyā dhammaṃ desetunti kukkuccāyantā na desesuṃ . athakho bhagavā pubbaṇhasamayaṃ nivāsetvā pattacīvaramādāya yena mahāpajāpati gotamī tenupasaṅkami upasaṅkamitvā paññatte āsane nisīdi . nisajja kho bhagavā mahāpajātiṃ gotamiṃ etadavoca kacci te gotami khamanīyaṃ kacci yāpanīyanti . pubbe me bhante therā bhikkhū āgantvā dhammaṃ desenti tena me phāsu hoti idāni pana bhagavatā paṭikkhittanti kukkuccāyantā na desenti tena me na phāsu hotīti . athakho bhagavā mahāpajātiṃ gotamiṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā pakkāmi . athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave bhikkhunūpassayaṃ upasaṅkamitvā gilānaṃ bhikkhuniṃ ovadituṃ evañca pana bhikkhave imaṃ sikkhāpadaṃ uddiseyyātha {430.1} yo pana bhikkhu bhikkhunūpassayaṃ upasaṅkamitvā bhikkhuniyo ovadeyya aññatra samayā Pācittiyaṃ tatthāyaṃ samayo gilānā hoti bhikkhunī ayaṃ tattha samayoti.