[458] Yo panāti yo yādiso .pe. Bhikkhūti .pe. Ayaṃ imasmiṃ atthe adhippeto bhikkhūti . bhikkhunī nāma ubhatosaṅghe Upasampannā . saddhinti ekato . saṃvidhāyāti abhirūhāma bhagini abhirūhāma ayya abhirūhāma ayya abhirūhāma bhagini ajja vā hiyyo vā pare vā abhirūhāmāti saṃvidahati āpatti dukkaṭassa . Bhikkhuniyā abhirūḷhe bhikkhu abhirūhati āpatti pācittiyassa . Bhikkhusmiṃ abhirūḷhe bhikkhunī abhirūhati āpatti pācittiyassa . Ubhato vā abhirūhati āpatti pācittiyassa . uddhagāmininti ujjavanikāya . adhogāmininti ojavanikāya . aññatra tiriyantaraṇāyāti ṭhapetvā tiriyantaraṇaṃ . kukkuṭasampāte gāme gāmantare gāmantare āpatti pācittiyassa . agāmake araññe aḍḍhayojane aḍḍhayojane āpatti pācittiyassa.

[459] Saṃvidahite saṃvidahitasaññī ekanāvaṃ abhirūhati uddhagāminiṃ vā adhogāminiṃ vā aññatra tiriyantaraṇāya āpatti pācittiyassa . Saṃvidahite vematiko ekanāvaṃ abhirūhati uddhagāminiṃ vā adhogāminiṃ vā aññatra tiriyantaraṇāya āpatti pācittiyassa . saṃvidahite asaṃvidahitasaññī ekanāvaṃ abhirūhati uddhagāminiṃ vā adhogāminiṃ vā aññatra tiriyantaraṇāya āpatti pācittiyassa . bhikkhu saṃvidahati bhikkhunī na saṃvidahati āpatti dukkaṭassa . asaṃvidahite saṃvidahitasaññī āpatti dukkaṭassa . asaṃvidahite vematiko āpatti dukkaṭassa . Asaṃvidahite asaṃvidahitasaññī anāpatti.

[460] Anāpatti tiriyantaraṇāya asaṃvidahitvā abhirūhanti Bhikkhunī saṃvidahati bhikkhu na saṃvidahati visaṅketena abhirūhanti āpadāsu ummattakassa ādikammikassāti. Aṭṭhamasikkhāpadaṃ niṭṭhitaṃ. -------