[461] Tena samayena buddho bhagavā rājagahe viharati veḷuvane kalandakanivāpe . tena kho pana samayena thullanandā bhikkhunī aññatarassa kulassa kulupikā hoti niccabhattikā . tena ca gahapatinā therā bhikkhū nimantitā honti. {461.1} Athakho thullanandā bhikkhunī pubbaṇhasamayaṃ nivāsetvā pattacīvaramādāya yena taṃ kulaṃ tenupasaṅkami upasaṅkamitvā taṃ gahapatiṃ etadavoca kimidaṃ gahapati pahūtaṃ khādanīyaṃ bhojanīyaṃ paṭiyattanti . therā mayā ayye nimantitāti . ke pana te gahapati therāti . ayyo sārīputto ayyo mahāmoggallāno ayyo mahākaccāno ayyo mahākoṭṭhito ayyo mahākappino ayyo mahācundo ayyo anuruddho ayyo revato ayyo upāli ayyo ānando ayyo rāhuloti . Kiṃ pana tvaṃ gahapati mahānāge tiṭṭhamāne cetake nimantesīti . Ke pana te ayye mahānāgāti . ayyo devadatto ayyo kokāliko ayyo katamorakatissako ayyo khaṇḍadeviyā putto ayyo samuddadattoti . ayañcarahi thullanandāya bhikkhuniyā antarā kathā vippakatā . atha [2]- therā bhikkhū pavisiṃsu. Saccaṃ mahānāgā kho tayā gahapati nimantitāti . idāneva kho tvaṃ ayye cetake akāsi Idāni mahānāgeti gehato ca nikkaḍḍhi niccabhattañca upacchindi . Ye te bhikkhū appicchā .pe. te ujjhāyanti khīyanti vipācenti kathaṃ hi nāma devadatto jānaṃ bhikkhunīparipācitaṃ piṇḍapātaṃ bhuñjissatīti .pe. saccaṃ kira tvaṃ devadatta jānaṃ bhikkhunīparipācitaṃ piṇḍapātaṃ bhuñjasīti . saccaṃ bhagavāti . vigarahi buddho bhagavā kathaṃ hi nāma tvaṃ moghapurisa jānaṃ bhikkhunīparipācitaṃ piṇḍapātaṃ bhuñjissasi netaṃ moghapurisa appasannānaṃ vā pasādāya .pe. evañca pana bhikkhave imaṃ sikkhāpadaṃ uddiseyyātha {461.2} yo pana bhikkhu jānaṃ bhikkhunīparipācitaṃ piṇḍapātaṃ bhuñjeyya pācittiyanti. {461.3} Evañcidaṃ bhagavatā bhikkhūnaṃ sikkhāpadaṃ paññattaṃ hoti.

[462] Tena kho pana samayena aññataro bhikkhu rājagahā pabbajito ñātikulaṃ agamāsi . manussā cirassāpi bhaddanto āgatoti sakkaccaṃ bhattaṃ akaṃsu . tassa kulassa kulupikā bhikkhunī te manusse etadavoca detha āvuso ayyassa bhattanti . athakho so bhikkhu bhagavatā paṭikkhittaṃ jānaṃ bhikkhunīparipācitaṃ piṇḍapātaṃ bhuñjitunti kukkuccāyanto nappaṭiggahesi nāsikkhi piṇḍāya carituṃ chinnabhatto ahosi . athakho so bhikkhu ārāmaṃ gantvā bhikkhūnaṃ etamatthaṃ ārocesi . bhikkhū bhagavato etamatthaṃ ārocesuṃ . athakho bhagavā etasmiṃ nidāne etasmiṃ pakaraṇe Dhammiṃ kathaṃ katvā bhikkhū āmantesi anujānāmi bhikkhave pubbe gihisamārambhe jānaṃ bhikkhunīparipācitaṃ piṇḍapātaṃ bhuñjituṃ evañca pana bhikkhave imaṃ sikkhāpadaṃ uddiseyyātha {462.1} yo pana bhikkhu jānaṃ bhikkhunīparipācitaṃ piṇḍapātaṃ bhuñjeyya aññatra pubbe gihisamārambhā pācittiyanti.