[481] Tena kho pana samayena disāsu vassaṃ vutthā bhikkhū rājagahaṃ āgacchanti bhagavantaṃ dassanāya . manussā nānāverajjake bhikkhū passitvā bhattena nimantenti . bhikkhū kukkuccāyantā nādhivāsenti paṭikkhittaṃ bhagavatā gaṇabhojananti . bhagavato etamatthaṃ ārocesuṃ . anujānāmi bhikkhave mahāsamaye gaṇabhojanaṃ bhuñjituṃ evañca pana bhikkhave imaṃ sikkhāpadaṃ uddiseyyātha {481.1} gaṇabhojane aññatra samayā pācittiyaṃ . tatthāyaṃ samayo gilānasamayo cīvaradānasamayo cīvarakārasamayo addhānagamanasamayo nāvābhirūhanasamayo mahāsamayo ayaṃ tattha samayoti. {481.2} Evañcidaṃ bhagavatā bhikkhūnaṃ sikkhāpadaṃ paññattaṃ hoti.

[482] Tena kho pana samayena rañño māgadhassa seniyassa bimbisārassa ñātisālohito ājīvakesu pabbajito hoti . athakho So ājīvako yena rājā māgadho seniyo bimbisāro tenupasaṅkami upasaṅkamitvā rājānaṃ māgadhaṃ seniyaṃ bimbisāraṃ etadavoca icchāmahaṃ mahārāja sabbapāsaṇḍikaṃ bhattaṃ kātunti . sace tvaṃ bhante buddhappamukhaṃ bhikkhusaṅghaṃ paṭhamaṃ bhojeyyāsi evaṃ kareyyāmīti . Athakho so ājīvako bhikkhūnaṃ santike dūtaṃ pāhesi adhivāsentu me bhikkhū svātanāya bhattanti . bhikkhū kukkuccāyantā nādhivāsenti paṭikkhittaṃ bhagavatā gaṇabhojananti . athakho so ājīvako yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ aṭṭhāsi. {482.1} Ekamantaṃ ṭhito kho so ājīvako bhagavantaṃ etadavoca bhavaṃpi gotamo pabbajito ahaṃpi pabbajito arahati pabbajito pabbajitassa piṇḍaṃ paṭiggahetuṃ adhivāsetu me bhavaṃ gotamo svātanāya bhattaṃ saddhiṃ bhikkhusaṅghenāti . adhivāsesi bhagavā tuṇhībhāvena . athakho so ājīvako bhagavato adhivāsanaṃ viditvā pakkāmi . athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave samaṇabhattasamaye gaṇabhojanaṃ bhuñjituṃ evañca pana bhikkhave imaṃ sikkhāpadaṃ uddiseyyātha {482.2} gaṇabhojane aññatra samayā pācittiyaṃ. Tatthāyaṃ samayo gilānasamayo cīvaradānasamayo cīvarakārasamayo addhānagamanasamayo nāvābhirūhanasamayo mahāsamayo samaṇabhattasamayo ayaṃ tattha samayoti.