[54] Tena kho pana samayena sambahulā bhikkhū sāketā sāvatthiṃ addhānamaggapaṭipannā honti . antarāmagge corā nikkhamitvā te bhikkhū acchindiṃsu . athakho te bhikkhū bhagavatā paṭikkhittaṃ aññātakaṃ gahapatiṃ vā gahapatāniṃ vā cīvaraṃ viññāpetunti Kukkuccāyantā na viññāpesuṃ yathānaggā va sāvatthiṃ gantvā bhikkhū abhivādenti . bhikkhū evamāhaṃsu sundarā kho ime āvuso ājīvakā ye ime bhikkhū abhivādentīti . Te evamāhaṃsu na mayaṃ āvuso ājīvakā bhikkhū mayanti . bhikkhū āyasmantaṃ upāliṃ etadavocuṃ iṅgha āvuso upāli ime anuyuñjāhīti . athakho te bhikkhū āyasmatā upālinā anuyuñjiyamānā etamatthaṃ ārocesuṃ . {54.1} Athakho āyasmā upāli te bhikkhū anuyuñjitvā bhikkhū etadavoca bhikkhū ime āvuso detha tesaṃ cīvarānīti. Ye te bhikkhū appicchā .pe. te ujjhāyanti khīyanti vipācenti kathaṃ hi nāma bhikkhū naggā āgacchissanti nanu nāma tiṇena vā paṭicchādetvā āgantabbanti . athakho te bhikkhū bhagavato etamatthaṃ ārocesuṃ . Athakho bhagavā etasmiṃ nidāne etasmiṃ pakaraṇe [3]- dhammiṃ kathaṃ katvā bhikkhū āmantesi anujānāmi bhikkhave acchinnacīvarassa vā naṭṭhacīvarassa vā aññātakaṃ gahapatiṃ vā gahapatāniṃ vā cīvaraṃ viññāpetuṃ yaṃ āvāsaṃ paṭhamaṃ upagacchati sace tattha hoti saṅghassa vihāracīvaraṃ vā uttarattharaṇaṃ vā bhummattharaṇaṃ vā bhisicchavi vā taṃ gahetvā pārupituṃ tañca kho labhitvā odahissāmīti no ce hoti saṅghassa vihāracīvaraṃ vā uttarattharaṇaṃ vā bhummattharaṇaṃ Vā bhisicchavi vā tiṇena vā paṇṇena vā paṭicchādetvā āgantabbaṃ natveva naggena āgantabbaṃ yo āgaccheyya āpatti dukkaṭassa . Evañca pana bhikkhave imaṃ sikkhāpadaṃ uddiseyyātha {54.2} yo pana bhikkhu aññātakaṃ gahapatiṃ vā gahapatāniṃ vā cīvaraṃ viññāpeyya aññatra samayā nissaggiyaṃ pācittiyaṃ . tatthāyaṃ samayo acchinnacīvaro vā hoti bhikkhu naṭṭhacīvaro vā ayaṃ tattha samayoti.