[557] Agilānena bhikkhunā cātumāsapaccayapavāraṇā sāditabbāti gilānapaccayapavāraṇā sāditabbā punapavāraṇāpi sāditabbā [2]- yadā gilāno bhavissāmi tadā viññāpessāmīti niccapavāraṇāpi sāditabbā [3]- yadā gilāno bhavissāmi tadā viññāpessāmīti.

[558] Tato ce uttariṃ sādiyeyyāti atthi pavāraṇā bhesajja- pariyantā na rattipariyantā atthi pavāraṇā rattipariyantā na bhesajjapariyantā atthi pavāraṇā bhesajjapariyantā ca rattipariyantā ca atthi pavāraṇā neva bhesajjapariyantā na rattipariyantā . Bhesajjapariyantā nāma bhesajjāni pariggahitāni honti ettakehi bhesajjehi pavāremīti . rattipariyantā nāma rattiyo pariggahitāyo honti ettakāsu rattīsu pavāremīti . bhesajjapariyantā ca rattipariyantā ca nāma bhesajjāni ca pariggahitāni honti rattiyo ca pariggahitāyo honti ettakehi bhesajjehi ettakāsu rattīsu pavāremīti . neva bhesajjapariyantā na rattipariyantā nāma bhesajjāni ca apariggahitāni honti rattiyo ca apariggahitāyo honti ettakehi bhesajjehi ettakāsu rattīsu pavāremīti.

[559] Bhesajjapariyante yehi bhesajjehi pavārito hoti tāni bhesajjāni ṭhapetvā aññāni bhesajjāni viññāpeti āpatti pācittiyassa . rattipariyante yāsu rattīsu pavārito hoti tā rattiyo ṭhapetvā aññāsu rattīsu viññāpeti āpatti pācittiyassa . Bhesajjapariyante ca rattipariyante ca yehi bhesajjehi pavārito hoti tāni bhesajjāni ṭhapetvā yāsu rattīsu pavārito hoti tā rattiyo ṭhapetvā aññāni bhesajjāni aññāsu rattīsu viññāpeti āpatti pācittiyassa . neva bhesajjapariyante na rattipariyante anāpatti.

[560] Nabhesajjena karaṇīye bhesajjaṃ viññāpeti āpatti pācittiyassa . aññena bhesajjena karaṇīye aññaṃ bhesajjaṃ viññāpeti āpatti pācittiyassa . taduttari taduttarisaññī bhesajjaṃ viññāpeti āpatti pācittiyassa . taduttari vematiko bhesajjaṃ viññāpeti āpatti pācittiyassa . taduttari nataduttari- saññī bhesajjaṃ viññāpeti āpatti pācittiyassa . nataduttari taduttarisaññī āpatti dukkaṭassa . nataduttari vematiko āpatti dukkaṭassa. Nataduttari nataduttarisaññī anāpatti.