[562] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena rājā pasenadi kosalo senāya abbhuyyāto hoti . chabbaggiyā bhikkhū uyyuttaṃ senaṃ dassanāya agamaṃsu . addasā kho rājā pasenadi kosalo chabbaggiye bhikkhū dūrato va āgacchante disvāna pakkosāpetvā etadavoca kissa tumhe bhante āgatatthāti . mahārājānaṃ mayaṃ daṭṭhukāmāti . kiṃ bhante maṃ diṭṭhena yuddhābhinandinaṃ nanu bhagavā passitabboti . manussā ujjhāyanti khīyanti vipācenti kathaṃ hi nāma samaṇā sakyaputtiyā uyyuttaṃ senaṃ dassanāya āgacchissanti amhākampi alābhā amhākampi dulladdhaṃ ye mayaṃ ājīvassa hetu puttadārassa kāraṇā senāya āgacchāmāti. {562.1} Assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ . ye te bhikkhū appicchā .pe. te ujjhāyanti khīyanti vipācenti kathaṃ hi nāma chabbaggiyā bhikkhū uyyuttaṃ senaṃ dassanāya gacchissantīti .pe. saccaṃ kira tumhe bhikkhave uyyuttaṃ senaṃ dassanāya gacchathāti . saccaṃ bhagavāti . Vigarahi buddho bhagavā kathaṃ hi nāma tumhe moghapurisā uyyuttaṃ senaṃ dassanāya gacchissatha netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. Evañca pana bhikkhave imaṃ sikkhāpadaṃ uddiseyyātha {562.2} yo pana bhikkhu uyyuttaṃ senaṃ dassanāya gaccheyya pācittiyanti. {562.3} Evañcidaṃ bhagavatā bhikkhūnaṃ sikkhāpadaṃ paññattaṃ hoti.

[563] Tena kho pana samayena aññatarassa bhikkhuno mātulo senāya gilāno hoti . so tassa bhikkhuno santike dūtaṃ pāhesi ahaṃ hi senāya gilāno āgacchatu bhaddanto icchāmi bhaddantassa āgatanti . athakho tassa bhikkhuno etadahosi bhagavā bhikkhūnaṃ sikkhāpadaṃ paññattaṃ na uyyuttaṃ senaṃ dassāya gantabbanti ayañca me mātulo senāya gilāno kathaṃ nu kho mayā paṭipajjitabbanti. Bhagavato etamatthaṃ ārocesuṃ . athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave tathārūpapaccayā senaṃ gantuṃ evañca pana bhikkhave imaṃ sikkhāpadaṃ uddiseyyātha {563.1} yo pana bhikkhu uyyuttaṃ senaṃ dassanāya gaccheyya aññatra tathārūpapaccayā pācittiyanti.