[59] Tañceti acchinnacīvarakaṃ bhikkhuṃ . aññātako nāma mātito vā pitito vā yāva sattamā pitāmahayugā asambaddho . Gahapati nāma yo koci agāraṃ ajjhāvasati . gahapatānī nāma yā kāci agāraṃ ajjhāvasati . bahūhi cīvarehīti bahukehi cīvarehi . abhihaṭṭhuṃ Pavāreyyāti yāvatakaṃ icchasi tāvatakaṃ gaṇhāhīti . Santaruttaraparamantena bhikkhunā tato cīvaraṃ sāditabbanti sace tīṇi naṭṭhāni honti dve sāditabbāni dve naṭṭhāni ekaṃ sāditabbaṃ ekaṃ naṭṭhaṃ na [1]- sāditabbaṃ . tato ce uttariṃ sādiyeyyāti taduttariṃ viññāpeti payoge dukkaṭaṃ paṭilābhena nissaggiyaṃ hoti nissajjitabbaṃ saṅghassa vā gaṇassa vā puggalassa vā . evañca pana bhikkhave nissajjitabbaṃ .pe. imaṃ me bhante cīvaraṃ aññātakaṃ gahapatikaṃ [2]- taduttariṃ viññāpitaṃ nissaggiyaṃ imāhaṃ saṅghassa nissajjāmīti .pe. dadeyyāti .pe. Dadeyyunti .pe. Āyasmato dammīti.

[60] Aññātake aññātakasaññī taduttariṃ cīvaraṃ viññāpeti nissaggiyaṃ pācittiyaṃ . aññātake vematiko taduttariṃ cīvaraṃ viññāpeti nissaggiyaṃ pācittiyaṃ . aññātake ñātakasaññī taduttariṃ cīvaraṃ viññāpeti nissaggiyaṃ pācittiyaṃ . ñātake aññātakasaññī āpatti dukkaṭassa . ñātake vematiko āpatti dukkaṭassa . Ñātake ñātakasaññī anāpatti.

[61] Anāpatti sesakaṃ āharissāmīti haranto gacchati sesakaṃ tuyheva hotūti denti na acchinnakāraṇā denti na naṭṭhakāraṇā Denti ñātakānaṃ pavāritānaṃ attano dhanena ummattakassa ādikammikassāti. Sattamasikkhāpadaṃ niṭṭhitaṃ. -------