[576] Surā nāma piṭṭhasurā pūvasurā odanasurā kiṇṇapakkhittā sambhārasaṃyuttā . merayo nāma pupphāsavo phalāsavo madhvāsavo guḷāsavo sambhārasaṃyutto . piveyyāti antamaso kusaggenapi pivati āpatti pācittiyassa.

[577] Majje majjasaññī pivati āpatti pācittiyassa . Majje vematiko pivati āpatti pācittiyassa . majje amajjasaññī pivati āpatti pācittiyassa . amajje majjasaññī āpatti dukkaṭassa . amajje vematiko āpatti dukkaṭassa . amajje amajjasaññī anāpatti.

[578] Anāpatti amajjañca hoti majjavaṇṇaṃ majjagandhaṃ majjarasaṃ taṃ pivati sūpasaṃpāke maṃsasaṃpāke telasaṃpāke āmalakaphāṇite amajjaṃ ariṭṭhaṃ pivati ummattakassa ādikammikassāti. Paṭhamasikkhāpadaṃ niṭṭhitaṃ. --------