[598] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena chabbaggiyā bhikkhū sattarasavaggiye bhikkhū bhiṃsāpenti . te bhiṃsāpiyamānā rodanti. Bhikkhū evamāhaṃsu kissa tumhe āvuso rodathāti . ime āvuso chabbaggiyā bhikkhū amhe bhiṃsāpentīti . ye te bhikkhū appicchā .pe. Te ujjhāyanti khīyanti vipācenti kathaṃ hi nāma chabbaggiyā bhikkhū bhikkhū bhiṃsāpessantīti .pe. saccaṃ kira tumhe bhikkhave bhikkhū bhiṃsāpethāti . saccaṃ bhagavāti . vigarahi buddho bhagavā kathaṃ hi nāma tumhe moghapurisā bhikkhū bhiṃsāpessatha netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. Evañca pana bhikkhave imaṃ sikkhāpadaṃ uddiseyyātha {598.1} yo pana bhikkhu bhikkhuṃ bhiṃsāpeyya pācittiyanti.

[599] Yo panāti yo yādiso .pe. Bhikkhūti .pe. Ayaṃ imasmiṃ atthe adhippeto bhikkhūti. Bhikkhunti aññaṃ bhikkhuṃ. {599.1} Bhiṃsāpeyyāti upasampanno upasampannaṃ bhiṃsāpetukāmo rūpaṃ vā saddaṃ vā gandhaṃ vā rasaṃ vā phoṭṭhabbaṃ vā upasaṃharati bhāyeyya vā so na vā bhāyeyya āpatti pācittiyassa . corakantāraṃ vā vāḷakantāraṃ vā pisācakantāraṃ vā ācikkhati bhāyeyya vā So na vā bhāyeyya āpatti pācittiyassa.

[600] Upasampanne upasampannasaññī bhiṃsāpeti āpatti pācittiyassa . upasampanne vematiko bhiṃsāpeti āpatti pācittiyassa . upasampanne anupasampannasaññī bhiṃsāpeti āpatti pācittiyassa.

[601] Upasampanno anupasampannaṃ bhiṃsāpetukāmo rūpaṃ vā saddaṃ vā gandhaṃ vā rasaṃ vā phoṭṭhabbaṃ vā upasaṃharati bhāyeyya vā so na vā bhāyeyya āpatti dukkaṭassa . corakantāraṃ vā vāḷakantāraṃ vā pisācakantāraṃ vā ācikkhati bhāyeyya vā so na vā bhāyeyya āpatti dukkaṭassa.